Візіт Кірыла І у Польшчу дапаможа прабачэнню гістарычных крыўдаў
16 жніўня пачаўся
візіт Патрыярха Маскоўскага і ўсяе Русі Кірыла І ў Польшчу. У яго рамках кіраўнік
Рускай Праваслаўнай Царквы і старшыня Канферэнцыі Каталіцкіх Біскупаў Польшчы арцыбіскуп
Юзэф Міхалік, падпішуць сумеснае пасланне да абодвух народаў. У гэтым дакуменце будзе
ўтрымлівацца разважанне аб стагоддзях гісторыі Расіі і Польшчы, заклік да ўзаемнага
прабачэння і прымірэння, а таксама будзе падкрэслівацца важнасць супольнага сведчання
і абароны хрысціянскіх каштоўнасцяў і культуры ў сучаснай Еўропе. У інтэрв’ю нашаму
радыё генеральны сакратар польскага епіскапату біскуп Войцех Поляк, адзначыў, што
падпісанне такога важнага з гістарычнага пункту гледжання дакументу, можа прынесці
багатыя духоўныя плёны, бо ў першую чаргу ён скіраваны да вернікаў – католікаў і праваслаўных.
“Сапраўды пасланне скіравана да вернікаў абодвух Цэркваў і грунтуецца на Евангеллі,
на закліку да прымірэння, які сфармуліраваў сам Хрыстус”, - адзначыў біскуп Поляк.
“Трэба
прызнаць, што дакумент не зможа развеяць усе існуючыя гістарычныя сумневы, якія павінны
быць вырашаны з часам і шчырасцю, праўдай і глыбокім навяртаннем сэрца, што прыйдзе
ў будучым. Наш дакумент, у рэальнасці, хоча прадставіць пачатак працэсу магчымага
прымірэння, грунтуючыся на праўдзе ўвогуле, а таксама на праўдзе гістарычнай. Таму
ён запрашае нас, а ў першую чаргу гісторыкаў, працягваць намаганні па дасладванні
і ўдакладненні тых складаных момантаў, якія былі ў мінулым”, - сказаў біскуп.
На
думку каталіцкага іерарха, каб пераадолець узаемныя раны, якія носяць народы Польшчы
і Расіі, неабходна каб прайшлі гады працы, заснаванай на шчырасці і праўдзе, асэнсаваных
абодвума бакамі.