Tetë vjet më parë, udhëtimi i fundit ndërkombëtar i të Lumit Gjon Pali II, pranë Zojës
së Lurdës
Tetë vjet më parë, më 14 e 15 gusht 2004, i Lumi Gjon Pali II, i moshuar e i ligështuar,
me vështirësi të mëdha në të folur për shkak të sëmundjes së Parkinsonit, u nis për
në shtegtimin e tij të fundit ndërkombëtar. Pak orë, tepër intensive, pranë Shenjtërores
së Zojës në Lurdë. Në homelinë e Meshës së 15 gushtit, solemniteti i Zojës së Madhe,
lanë mbresa të thella këto fjalë: “Në ato ditë, Maria u nis drejt malit… Fjalët e
tregimit ungjillor, na bëjnë të shikojmë me sytë e zemrës, vashën e re të Nazaretit,
në udhë drejt atij “qyteti të Judesë”, ku banonte kushërira, për t’i shërbyer. Na
bën përshtypje sidomos kujdesi plot butësi i Marisë për kushërirën e moshuar. E saja,
është dashuri konkrete, që nuk kufizohet në fjalë dashamirësie, por merr përsipër
personalisht lodhjen e asistencës. Virgjëra nuk i dhuron kushërirës thjesht, diçka
nga vetja; i dhuron vetveten, pa kërkuar asgjë si shkëmbim. E kupton mirë se dhurata,
që i ka dhënë Zoti, më tepër se privilegj, është detyrë, që e impenjon për të tjerët
pa interes, siç është karakteristike për dashurinë”. Ndër 104 udhëtimet e Papës së
lum jashtë Italisë, ky na jep një këndvështrim të veçantë për festën e sotme të Zojës
së Madhe.