Përkujtimi i Shën Kiarës së Asizit, që na fton t’ia dhurojmë jetën Krishtit.
Lindi më 16 korrik 1194 në Asizi. Ishte bijë e Favrone Offreduccios dhe Ortolanës.
Emri i saj është i lidhur ngushtë me atë të Shën Françeskut. Kur fama e Françeskut
u përhap në gjithë qytetin, në sa një pjesë e mirë e asizianëve mendonin se i biri
i Bernardonit ishte çmendur, Kiara u mahnit nga ideali françeskan i varfërisë, ndjeu
një thirrje të fuqishme për ta ndjekur dhe, duke ecur në këtë rrugë, u mbyll në kuvend
bashkë me shoqet e para. Themeloi kështu klariset, murgesha kundruese, që u përhapen
kudo në botë. Kiara vdiq më 11 gusht 1253. Në salikimet e saj solemne mori pjesë
edhe Papa Inoçenci IV me një numër të madh shoqëruesish nga autoritetet më të larta
të Kishës. Natyrisht për të marrë pjesë në një ngjarje kaq të jashtzakonshme, rrani
gjithë populli i vendit e i rrethinave. Nuk ishte parë kurrë një turmë aq e madhe
në Asizi. Papa propozoi që salikimet të mos kremtoheshin me oficen e të vdekurve,
por me atë të virgjërave. Në këtë mënyrë do ta shpallte shenjte para se të zbriste
në varr. Njëri nga kardinajtë i tërhoqi vëmendjen, duke i kujtuar se një kremtim i
tillë nuk përkonte me praktikën e Kishës. Dhe qe një fat i madh, sepse gjatë procesit
për shenjtërimin e saj u pyetën shumë dëshmitarë dhe u grumbulluan dëshmi, të cilat
përbëjnë një pasuri të madhe për françeskanizmin e për mbarë Kishën. Por të mos ishte
ndjekur praktika e shenjtërimit, këto dëshmi ndoshta nuk do të ishin njohur kurrë. Për
Shenjtoren asiziane ka foluredhe Benedikti XVI. Në audiencën e
përgjithshme të 10 gushtit 2011, natë e festës liturgjike të Shën Kiarës, në sa u
kujtonte besimtarëve se duhet heshtur, për ta dëgjuar zërin e Zotit, mendimi i Atit
të Shenjtë shkoi nga kështjella e moçme e Papëve, tek një kuvend i largët, ai i Shën
Damianit, në Asizi, oazë e shpirtit, tepër e dashur për familjen françeskane e për
gjithë të krishterët. Pranë kësaj kishëze, rindërtuar nga Shën Françesku pas kthesës
së madhe, pohoi Papa, Kiara dhe shoqet e saj krijuan bashkësinë e tyre, duke jetuar
në shoqëri me ‘motrën varfëri”, me lutje e punë të vogla, që u siguronin jetesën e
përditshme: “Quheshin ‘Motrat e varfëra’ e forma e tyre e jetës ishte si ajo
e fretërve të vegjël. Jetonin sipas mësimeve të Ungjillit të Zotit tonë Jezu Krishtit,
duke ruajtur bashkimin dhe dashurinë e anasjelltë e duke ecur mbi gjurmët e Jezusit
e të Nënës së tij Shenjte, në rrugën e varfërisë e të përvujtërisë”. Në këtë
vend, ashtu si në oazat e tjera të shpirtit, shtoi Papa, mund të shihet menjëherë
pasqyrimi i harmonisë shpirtërore, që bashkësitë murgare e jetojnë ditë për ditë:“Duke
i parë gjërat me syrin shpirtëror, këto vende të shpirtit janë struktura të rëndësishme
të botës! E nuk është rastësi që shumë njerëz, posaçërisht në periudhën e pushimeve,
i vizitojnë këto vise e ndalohen aty për disa ditë, sepse edhe shpirti ka kërkesat
e veta”.