Рым: канферэнцыя аб аўтары Грыгарыянскага календара
Хтосьці можа спытаць,
чаму ў перыяд з 5 па 14 кастрычніка 1582 г. у каталіцкіх краінах не нарадзілася ніводнага
дзіця, ніхто не браў шлюб і не паміраў. Адказ на гэта пытанне вельмі просты: гэтых
10 дзён не існавала. У гэты год, па ініцыятыве папы Грыгорыя XIII, быў прыняты новы
каляндар, якому было нададзена імя Пантыфіка, і такім чынам, пасля чацверга 4 кастрычніка
адразу наступіла пятніца 15 кастрычніка. З 1579 г. спецыяльную Папскую камісію па
рэформе каляндара ўзначальваў нямецкі езуіт Хрыстафор Клавій. Менавіта постаці гэтага
навукоўцы будзе прысвечана навуковая канферэнцыя, якая пройдзе ў Папскім Грыгарыянскім
універсітэце 19 кастрычніка.
У форуме пад назвай “Хрыстафор Клавій. На парозе
навукі – яго навучанне і сеці” прымуць удзел матэматыкі, фізікі, астраномы, гісторыкі
з розных краін Еўропы. Падчас канферэнцыі будзе прадстаўлены праект лічбавай дакументацыі
спадчыны вялікага матыматыка, рэалізаваны Папскім Грыгарыянскім універсітэтам і некаторымі
фондамі і арганізацыямі, якія працуюць у галіне інфарматыкі. Яго мэта заключаецца
ў тым, каб захаваць дакументы Клавія ў лічбавым фармаце і пазнаёміць з імі будучыя
пакаленні. Зборнік гэтых дакументаў складаецца з 366 лістоў якія матэматык скіраваў
ў перыяд паміж 1570 г. і 1612 г., да вядомых еўрапейскіх навукоўцаў тых часоў, сярод
якіх Галілеа Галілей, аўстрыйскі астраном Хрыстафор Грэнбергер, бельгійскі матэматык
Андрыян ван Румэн і інш. Акрамя таго, ён уключае ў сябе сем манускрыптаў самаго Клавія,
у якіх захаваліся яго разлікі, карты і каментары. Гэтыя матэрыялы з’яўляюцца каштоўнымі
для таго, каб пазнаёміцца з развіццём навукі ў тую эпоху.