Աղթամար եկեղեցւոյ վերակառուցումէն ետք թրքական կառավարութիւնը այժմ սկսած է Վանի (Չարփանաք)
Կտուց կղզիի եկեղեցւոյ վերանորոգման ուղղութեամբ աշխատանքներ իրականացնել: Ինչպէս
կը տեղեկացնէ «Ջիհան» գործակալութիւնը, վերակառուցումը կը կատարուի Վանի մէջ տեղի ունեցած
երկու աւերիչ երկրաշարժերէն ետք զբօսաշրջութիւնը զարգացնելու նպատակով: Մինչեւ 1915-ը
գործած Կտուցի եկեղեցւոյ վերականգնման ուղղուած նախնական աշխատանքները արդէն սկսած են:
Կ’ընթանան նաեւ Աղթամարի Սուրբ Խաչ եկեղեցւոյ մէջ երրորդ պատարագը մատուցելուն ուղղուած
աշխատանքները: Թուրք ճարտարապետները կը նշեն, որ 1720-ին տեղի ունեցած երկրաշարժէն
եկեղեցին էական վնաս կրած, սակայն կանգուն եղած է մինչեւ 1915-ը:
Ուսումնասիրութիւնները
ցոյց տուած են, որ 2011-ի երկրաշարժէն ան լուրջ վնաս չէ կրած: «Եուզընճը յըլ» համալսարանի
ճարտարապետաշինարարական համալսարանի դոցենտ Սահաբեթթին Օզթիւրքը նշած է, որ վերակառուցման
նախագիծը արդէն կայ եւ շուտով աշխատանքները պիտի սկսին:
«Նախ եկեղեցւոյ հիւսիսին
եւ արեւմուտքին պեղումներ պէտք է կատարել: Սակայն փորելուն զուգահեռ վերակառուցման աշխատանքներն
ալ պէտք է րոպէ առաջ սկսիլ, որպէսզի ան շուտով նախկին գործառոյթներուն վերադարձուի: Վանի
նահանգապետարանն ու Մշակոյթի եւ զբօսաշրջութեան վարչութիւնը արդէն այդ ուղղութեամբ քայլեր
կը ձեռնարկեն,-ըսած է ան: