Njëqind vjet Pavarësi. Virtytet tradicionale të shqiptarit: Mirërritja e fëmijëve
Po e fillojmë ciklin kushtuar virtyteteve të shqiptarit në shekuj, me mirrërritjen
e fëmijëve, sepse pikërisht me këtë virtyt krijohet harmonia, vazhdimësia e dokeve
dhe e zakoneve më të mira, nga breznia në brezni. Në familjen shqiptare, për fëmijët
e vegjël, si djem, ashtu edhe vajza, kujdesej gjithnjë nëna. Ajo i lante, i ndërronte,
i ruante prej rreziqesh, i ndiqte në marrëdhëniet e tyre shoqërore, hynte në botën
e tyre shpirtërore, për të ditur ku shkojnë, me kë rrinë, si sillen e si formohen,
në lidhjet me mjedisin e jashtëm. Ajo ishte gjithnjë mësuesja e parë e fëmijës,
të cilit i jepte mësimet fillestare të fesë, të jetës shoqërore e të praktikës së
përditshme. Nëna i mësonte fëmijët si t’i përshndesin miqtë, si t’ua japin dorën,
si të ngrihen në këmbë, kur hyn kush në dhomë, si t’ua ndezin cigaren burrave; si
të rrinë në shtëpi të vet e në të huajën, pa bërë zhurmë; si të heshtin, kur bisedojnë
të mëdhenjtë; si ta çojnë një send që ka rënë në tokë, si të bëjnë punë të vogla nëpër
shtëpi e si t’i përgjigjen kërkesave, që krijon çdo çast jeta e përditshme. Kur
fëmijët bëheshin 10-12 vjeç, atëherë me djemtë merrej më shumë babai; me vajzat, nëna.
Prej këndej, fjalët e urta popullore: “Ditës shihi diellin, babës shihja t’birin”;
“Natës shihi hënën, vajzës, nënën”. Sipas nevojave të shtëpisë, fëmijëve u caktoheshin
punë të vogla, si të shkonin me qengja, me keca e me viça. Në këtë rast babai i porosiste
djemtë të mos zihen me shokë, të mos dëmtojnë gjënë e huaj, të mos vjedhin, të mos
i lënë bagëtitë vetëm, të mos ngacmojnë vajzat me fjalë e as me lojë. Këto mësime,
të përsëritura shpesh, babai i përforconte edhe me shembuj, që i nxirte nga jeta e
përditshme: “Kështu i ndodhi filanit, kështu filanit, prandaj të mos na ndodhë edhe
ne kjo gjë, që të mos turpërohemi”- ishte porosia kryesore, që i jepte në fund prindi
fëmijës. Babai i përshkruante fëmijës farë e fisin, miqtë e armiqtë, nevojat e
punët që duheshin bërë; tokat, që duheshin punuar; nënshtrimin kundrejt prindërve
e kundrejt më të mëdhenjve; sjelljen kundrejt të tjerëve. E nxiste e i jepte zemër
të mos e dinte veten të vogël, por të zotin për t’iu bërë shumë shpejt krah në kullotjen
e gjësë së gjallë, në ruajtjen e shtëpisë e të kopshtit, në vaditjen e arës, duke
i sjellë ujin a duke i mbajtur pishën. Kështu, në mendjen e fëmijës, nga bisedat
e shpeshta e, sidomos, nga shembulli i prindit, vjen e skalitet, pa u kujtuar, kuptimi
i virtyteve, që do të ndiqen në jetë e i veseve, që do të urrehen. Fëmija fiton një
natyrë të pasur me virtyte, trashëguar nga i ati, ashtu si i ati i ka trashëguar nga
të parët e vet në rrethin ku jeton, i cili i ka shenjtëruar, duke i bërë të domosdoshme
për shtëpi të ndershme e për shoqëri që bazohet mbi një rend të patundur. Kështu
babai mendonte t’i jepte fëmijës çka vlerësonte më shumë në jetë, përpiqej ta bënte
të aftë për shoqëri e për shtëpi. Në këtë mënyrë u rritën, në trojet shqiptare,
burrat që u shquan për nder, besë, burrëri, urti, guxim, bujari e për virtytet e tjera
të rralla, që nuk i gjen as në jetën e kulturuar të vendeve të përparuara. Mirërritja
e fëmijëve në trojet shqiptare ka pa dyshim, brumë të pasur e të zgjedhur, vërtet
të ngjeshur në mënyrë primitive, larg rregullave e drejtimeve moderne të edukatës,
por që përbëjnë një sistem më vete; sistem të shtrëngueshëm e të prerë, ashtu si janë
tokat, malet, gurrat, shpellat e pyjet, plot vrazhdësi e bukuri, plot dritë-hije,
por gjithnjë madhështore, të çuditshme, tërheqëse. Ndërmjet virtyteve më të njohura
të trojeve shqiptare, spikasin Nderi, Burrëria e Besa përkrah të cilave, edhe Urtia,
Drejtësia, Trimëria e Mikpritja, virtyte, që e kanë dalluar gjithnjë shqiptarin ndërmjet
popujve të tjerë.