Faqja e kalendarit kujton Shën Domenikun, shqip, Shën Deda.
Domeniko di Guzman, Domingo a Dominiko në Spanjisht, Deda në shqip, rregulltar e meshtar,
lindi rreth vitit 1170; vdiq më 6 gusht 1221; u shpall shenjt më 2 korrik 1234, përkujtohej
më 4 gusht, festë që më pas u caktua më 8 gusht, sepse pikërisht në këtë datë e kremtojnë
shumë nga vendet, që e zgjodhën si pajtor. Shenjat dalluese të Shenjtit janë ylli
në ballë, simbol i dritës hyjnore, që ndriçon mendjen; zëmbaku i bardhë, simbol i
pastrisë virgjërore dhe qeni, simbol i besnikërisë. E pikërisht nga fjala ‘cane’-
“qen” e jo nga emri Domenik, vjen edhe vetë emri i Urdhërit të Vëllezërve Predikatarë,
domenikanëve, që synojnë besnikërinë e plotë, pa asnjë kusht, deri në mundime e në
vdekje, ndaj Zotit! Ngjarja më e rëndësishme në jetën e Murgut Predikatar ishte
dukja e Zojës së Bekuar, që i dorëzoi Rruzaren Shenjte për të luftuar, pa dhunë,
herezinë albigjeze, gjë që e shikojmë në figuret e Zojës Rruzare, qe cila paraqitet
pikërisht në aktin e këtij dorëzimi. E Rruzarja u bë një nga lutjet më tradicionale
katolike. Urdhëri i domenikanëve, miratuar më 22 dhjetor 1216 nga Papa Onori III,
i shtoi aq radhët, sa shumë shpejt i nisi murgjërit e vet në të gjithë Evropën, posaçërisht
në qendrat universitare të kohës. Urdhëri u prit me simpati të madhe e pati shumë
njerëz që deshën ta mbështesnin me dhurata të pasura. Po Shenjti themelues nuk i
pranoi. Deshi që ndjekësit e tij të mos kishin asgjë mbas shpirtit e të jetonin me
lëmoshë. Predikim, studim, varfëri lypsarësh, jetë e përbashkët, përhapje gjeografike,
veprimtari misionare: këto kërkesa janë në bazë të Regullës domenikane, për të cilën
shën Domeniku shkriu gjithë jetën. I lodhur për vdekje nga puna apostolike, në sa
përgatiste një mision të ri në Kumani e për këtë arsye studionte gjuhën e këtij populli,
e i këputur nga pendesat e shumta, Domeniku mbylli sytë për dritën e kësaj bote më
6 gusht 1221, në kuvendin e shumëdashur të Bolonjës, sot bazilika e Shën Dedës, në
një qeli, që nuk ishte e tija, sepse ai, themeluesi, nuk pati kurrë qelinë e vet.
S’pati qeli, po pati shumë vëllezër, që e rrethuan me lot në sy, në sa ndahej prej
tyre, jo përgjithmonë, duke u hapur rrugën kah ‘kuvendet domenikane’ qiellore.