Бэнэдыкт XVI: “Так” радасці – значыць “так” жыццю

Бэнэдыкт XVI дзякаваў 3 жніўня вечарам сваім землякам з Баварыі за канцэрт традыцыйнага фальклору, які прайшоў на падворку Апостальскага палацу ў Кастэль Гандольфа. Папа ўсклікнуў па-баварску: “Vergelt’s Gott” (заплаці Божа). Святы Айцец запэўніў, што гэты вечар дазволіў яму пабываць на Радзіме. Ён з гонарам адзначыў, што баварская культура – гэта культура весялосці, якая нараджаецца з прыняцця свету, з унутранага “так” жыццю, а значыць, “так” радасці адчування гармоніі з усім стварэннем і Створцам. Паводле Папы, гэта не складана зрабіць, бачачы шчодрасць Бога, Які зрабіў Баварыю поўняй прыгажосці. “Яна стала такой прыгожай толькі праз чалавечую культуру, іх веру і радасць, спевы, музыку і мастацтва. (...) Бог пажадаў зрабіць гэта з дапамогай людзей”, - сказаў Пантыфік.Бэнэдыкт XVI запытаўся ў землякоў, ці можна так радавацца жыццю ў моры праблем і пакут, моцнай цемры, што існуе ў свеце. “Так” – адказаў сам Святы Айцец, бо без радасці немагчыма нікому дапамагчы. І хрысціяне гэта ведаюць дзякуючы сваёй веры. “Хто не любіць сябе самаго, не можа нічога даць іншаму, не можа дапамагчы, не можа быць прапаведнікам міру”, - выказаў перакананне Святы Айцец.

Падзякаваўшы ўсім гасцям, якія прывезлі яму часцінку Бацькаўшчыны, на чале з кардыналам Рэйнхардам Марксам, Папа асабліва адзначыў Баварскіх горных стралкоў за іх фальклорныя спевы і за тое, што прызналі яму тытул ганаровага стралка. Папа прыгадаў, што ў юнацтве належаў да гэтага аб’яднання. Асаблівым чынам Святы Айцец падзякаваў арцыбіскупу Мюнхенска-Фрайзінгскаму на пенсіі, кардыналу Фрыдрыху Вэтэру, за яго прысутнасць на “баварскім вечары”. Іерарх, дарэчы, стаў наступнікам кардынала Ратцынгера на гэтай кафедры, калі апошні быў прызначаны прэфектам Кангрэгацыі Веравучэння.