Ватыканіст: з’яўляенне энцыклікі Папы аб веры – своечасовае
Італьянскі ватыканіст
Паола Радары мяркуе, што тэма чацвертай энцыклікі, якую плануе напісаць Бэнэдыкт XVI,
нарадзілася яшчэ ў той момант, калі кардынал Ратцынгер быў абраны на Пасад св. Пятра.
24 красавіка 2005 г., у гаміліі падчас св. Імшы, якой адкрываўся яго пантыфікат, Святы
Айцец казаў, што задача Касцёла заключаецца ў тым, каб “вывесці людзей з пустыні,
да месца жыцця, да сяброўства з Сынам Божым”. Менавіта таму, паводле журналіста, Папа
прыйшоў да напісання афіцыйнага дакументу аб значэнні веры. Радары цытуе таксама словы
Бэнэдыкта XVI, напісаныя ў Апостальскім пасланні “Porta fidei”, якім Пантыфік абвясціў
Годзе Веры ў Каталіцкім Касцёле. Святы Айцец падкрэсліў у ім, што “часта хрысціяне
больш хвалююца аб грамадскіх, культурных і палітычных наступствах сваёй дзейнасці,
працягваючы думаць аб веры, як аб нечым дадатковым у супольным жыцці”. Аднак Касцёл
не можа дапусціць “каб соль губляла свой смак, а святло хавалася”.
Журналіст
таксама нагадаў, што аб першаснасці веры ў адносінах да дзеянняў, казаў яшчэ ў 1967
г. папа Павел VI , калі абвяшчаў Год Веры ў Касцёле. Паводле Паола Радары няма нічога
дзіўнага, што новая энцыкліка Бэнэдыкта XVI з’явіцца ў той час, калі вернікі перажываюць
Год Веры, адзначаюць 50-годдзе адкрыцця ІІ Ватыканскага Сабора і 20-годдзе публікацыі
Катэхізіса Каталіцкага Касцёла, над якім кардынал Ратцынгер працаваў у якасці прэфекта
Кангрэгацыі Веравучэння. Такім чынам, Паола Радары свярджае, што з’яўлянне новага
дакумента Пантыфіка цалкам адпавядае працягласці традыцыі. Паводле яго, Папа не любіць
спяшацца і выкарыстае столькі часу, колькі трэба для напісання сваёй чацвёртай энцыклікі.