Մարոնի համայնքի Պշարա Ռայի պատրիարքը երէկ առաւօտեան Տիմանի մէջ նախագահեց Մարոնի եպիսկոպոսներու
խորհուրդի ընթացիկ նիստին, որուն ընթացքին քննարկուեցան Լիբանանի եւ մարոնի եկեղեցւոյ
վերաբերող հարցեր: Մարոնի եպիսկոպոսներու խորհուրդի նիստէն բխած հաղորդագրութիւնը
կարդաց Սելիմ Մազլում եպիսկոպոսը, որ կոչ ուղղեց լիբանանցիներուն համախմբուելու լիբանանեան
բանակին շուրջ, որպէսզի անիկա մնայ Լիբանանին սպառնացող վտանգները արգիլող ամուր բերդը: Մազլում
եպիսկոպոսը յայտնեց, որ քաղաքական որոշումին եւ տնտեսական կեցուածքին առումով Լիբանան
պիտի գտնուի սնանկութեան սեմին, եթէ անոր ղեկավարութիւնը շարունակէ անպատասխանատու կերպով
վարուիլ: «Մարոնի եպիսկոպոսները կը փափաքին, որ իրենց հաղորդագրութիւնը նկատուի ահազանգ
մը, որ կը հնչէ եւ բոլորը կը հրաւիրէ ստանձնելու իրենց պատասխանատուութիւնները եւ անյապաղ
լուծելու Լիբանանի դիմագրաւած հարցերը», յայտնեց Մազլում եպիսկոպոս: Ան շեշտեց, որ
լիբանանցիները եւ լիբանանցի բոլոր պատասխանատուները պէտք է պատասխանատուութիւն ստանձնեն`
Լիբանանը պահպանելու առումով, այլապէս լիբանանեան պետութիւնը պիտի ըլլայ սնանկացած պետութիւն
մը` բարոյական, նիւթական եւ օրինական առումներով: Մարոնի եպիսկոպոսները հաստատեցին,
որ 1975-էն ի վեր Լիբանանի վկայած ընկերային եւ տնտեսական իրականութիւնը դժուար պայմաններ
կը դիմագրաւէ. անոնք նկատել տուին, որ շրջանին մէջ տիրող տագնապալի եւ պատերազմական իրավիճակին
զուգահեռ Լիբանանի ելեկտրականութեան թղթածրարը վտանգաւոր դարձած է երկրին ազգային տնտեսութեան
համար եւ սկսած է իր ժխտական ազդեցութիւնը ունենալ նաեւ այլ մարզերու վրայ ու տկարացնել
զանոնք: