Kujtuam, në emisionet e kaluara të Radio Vatikanit, Koncilin I kishtar të Ilirisë,
mbajtur për t’iu kundërvënë herezisë së pneumatomakëve. Por, pas dënimit të saj, jeta
e Kishës në botën lindore do të vuante pasojat e çrregullimeve të tjera, që kishin
të bënin, sidomos, me zgjedhjen dhe emërimin e ipeshkvijve, përcaktuar saktësisht
në përfundim të Koncilit I Kishtar të Ilirisë si dhe në letrën e Valentinianit,
bashkëngjitur me dokumentet e Koncilit. Koncili II Kishtar i Ilirisë u mor
kryesisht me shqyrtimin e çështjes së priftit të Korintit, Perigjeni, të cilin ipeshkvi
i këtij qyteti, Aleksandri, e shuguroi në Patras. Shugurimi shkaktoi shumë trazira
në jetën kishtare të vendit, sepse besimtarët nuk e pranuan ipeshkvin e ri. U desh
të mblidheshin në Koncil ipeshkvijtë, për t’i dhënë fund situatës së konfliktit ndërmjet
besimtarëve e prelatëve. Kush kishte të drejtë? Pse u kundërshtua kaq energjikisht
hyrja e ipeshkvit të ri në selinë e tij? Si e përligjnin besimtarët kundërshtimin
e tyre? Këtyre pyetjeve do t’u jepte përgjigje Koncili, ku u njoh ndershmëria e Perigjenit.
Prej këndej, etërit konciliarë i drejtuan Romës një letër, përmes së cilës deklaronin
se ipeshkvi i ri ishte i denjë për selinë e tij ipeshkvnore. Natyrisht që një qëndrim
i tillë nuk i kënaqi aspak kundërshtarët, të cilët i vijuan për një kohë të gjatë
trazirat. Ndërkaq Aleksandri, ipeshkvi i Korintit vdiq, e korintianët shprehën
dëshirën që, në krye të Kishës së tyre të ishte Perigjeni. U kërkua miratimi i Papës
Bonifaci I (518), i cili u përgjigj pozitivisht, por shqetësimet vijuan, duke thelluar
mosmarrëveshjet ndërmjet Kishës së Romës e asaj të Kostandinopojës, si dhe ndërmjet
vetë Papës Bonifaci e ipeshkvijve të Ilirisë. Nga një Koncil i organizuar përskaj
trojeve ballkanike, doli përsëri në plan të parë problemi i pazgjidhur edhe sot e
kësaj dite: ai i parisë në Kishën universale. Thamë më sipër se ipeshkvijtë e
mbledhur në Koncilin Kishtar të Korintit i drejtuan Papës një letër, përmes së cilës
ankoheshin për procedurën e ndjekur në Koncil. Papa i ktheu përgjigje ipeshkvit Rufo,
të cilit i qe besuar kujdesi baritor për Kishat e Maqedonisë e të Akajës, domethënë
për provincat e Rufos e të Perigjenit, duke i kërkuar ta pranonte kërkesën, që i kishin
drejtuar korintianët. (ep. 4, në P.L.- XX, col.760-61.Collectio Thessalonicensis 7;
Regesta Pontificum Romanorum, nr. 350). Në një letër të dytë, Bonifaci i komunikonte
ipeshkvit të Selanikut se do të priste përgjigjen e tij, para se t’i shkruante personalisht
Perigjenit (ep. 5,4). Po ky problem mbeti i pazgjidhur për shumë kohë. Atëherë
disa ipeshkvij të Thesalisë, të pakënaqur nga qëndrimi i Rufos dhe i Bonifacit papë,
në favor të Perigjenit, iu drejtuan ipeshkvit të Kostandinopojës, Atikut e, përmes
tij, Perandorit të Lindjes, Teodosit II. Ky, duke pasur parasysh se provincat e Ilirikut
lindor në shekullin V i përkisnin administrativisht Perandorisë së Lindjes, shpalli
një dekret, që shkaktoi një konflikt të ri, i cili ia kalonte shumë atij, që mbiu
pas zgjedhjes së një ipeshkvi: ishte ndeshje e re për pari ndërmjet Romës e Kostandinopojës.
Mendohet të jetë shkruar nga Bonifaci I edhe një letër, drejtuar nëntë ipeshkvijve
të Ilirikum, përmes së cilës Papa ndërhynte në mbrojtje të Feliksit, ipeshkëv i Durrësit,
kundër grupit, që e akuzonte, dhe jepte porosi për forcimin e frymës vëllazërore ndërmjet
prelatëve të kësaj zone të trazuar, sa në jetën politike, aq edhe në atë kishtare.