Հալէպի Շուրջ 200.000 Բնակիչ Երկու Օրուան Ընթացքին Լքած է Քաղաքը. Բախումները Կը Շարունակուին
Սուրիոյ տնտեսական մայրաքաղաք Հալէպի շուրջ 200.000 բնակիչ ստիպուած եղած է լքելու քաղաքը,
երբ կառավարական ուժերը Յուլիս 28-ին սկսած են քաղաքը «մաքրել» զինեալ ընդդիմադիրներէն:
Այս մասին յայտարարած է ՄԱԿ-ի մարդասիրական առաքելութեան կազմակերպութեան ղեկավար Վալերի
Ամոսը:
Ըստ France press գործակալութեան՝ Ամոս անհանգստութիւն յայտնած է, որ կառավարական
զօրքերը Հալէպի մէջ հրասայլեր, հրետանի ու ծանր զէնքեր կը կիրառեն: Անոր տուեալներով`
բազմաթիւ բնակիչներ կը փափաքին լքել ռազմական գործողութիւններու վայրերը, սակայն նման
հնարաւորութիւն չունին: Բացի այդ` Հալէպի մէջ կայ խմելու ջուրի, ինչպէս նաեւ մաքրութեան
պարագաներու պակաս:
Ականատեսները կը պնդեն, սակայն, որ հակառակ կառավարութեան
ջանքերուն՝ առայժմ հնարաւոր չէ եղած ճնշել ապստամբները:
Սուրիոյ կառավարութիւնը
Հալէպի համար պայքարը կը դիտարկէ իբրեւ քաղաքացիական պատերազմի եզրափակիչ փուլ, սակայն
ընդդիմութեան հրամանատարները կը խոստանան Հալէպը «գերեզման դարձնել սուրիական բանակի
համար»:
Հալէպը Սուրիոյ խոշորագոյն քաղաքն ու տնտեսական կեդրոնն է` շուրջ 2.5
միլիոն բնակչութեամբ: Վերջին օրերու մարտական գործողութիւններուն ընթացքին զոհերու եւ
վիրաւորներու մասին ստոյգ տեղեկութիւններ չկան տակաւին:
Տեղեկութիւններ կան, որ
երէկ Հալէպի Սալահըտտին թաղամասին մէջ՝ Սուրիական կառավարական զօրքերէն անջատուելով՝
չորս հրասայլի անձնակազմ անցած է Սուրիական ազատ բանակին կողմը:
Երկրի արտաքին
գործոց նախարար Ուալիտ Մուաալէմ, սակայն, Իրան կատարած այցելութեան ընթացքին յայտարարած
է, որ Հալէպի մէջ իրենք պիտի յաղթեն:
Սուրիոյ ազգային խորհուրդը, իր հերթին, միջազգային
հանրութեան կոչ ուղղած է զինելու սուրիացի ապստամբները: Ազգային խորհուրդի ղեկավար
Ապտուլպասիթ Սէյտան՝ Ապու Տապիի մէջ յայտարարած է, որ իրենց անհրաժեշտ են հրասայլերու,
ռազմական օդանաւերու դէմ արդիւնաւէտ զէնքեր:
Ան նաեւ պնդած է, որ Սուրիոյ նախագահ
Պաշար ալ Ասատին որեւէ երկրի մէջ ապաստան տալու փոխարէն պէտք է դատել` «իրականացուցած
սպանդին պատճառով»:
Սուրիոյ մէջ շուրջ 18 ամիս շարունակուող ռազմական գործողութիւններուն
իբրեւ արդիւնք՝ արդէն զոհուած է շուրջ 19.000 մարդ: