3. Koncili i Ilirikum i vitit 375 pas Krishtit. Ky koncil u mbajt në trojet
ilirike, asokohe nën sundimin e Perandorisë romake. Mblidhte prelatët e një Kishe,
që tashmë shtrihej në gjithë bregdetin e Adriatikut dhe të Jonit e deri në thellësi
të trojeve lindore, duke arritur në Danub e në detin Egje. Ishin trojet klasike,
në të cilat ndesheshin interesat ndërmjet Romës së vjetër e asaj të Re. Koncili
i Ilirisë, që u mblodh në vitin 375, nën perandorin Valentiniani (321-375) u drejtoi
të gjitha Kishave lindore një letër, përmes së cilës dënonte ashpër herezinë e pneumatomakëve.
Ishte fjala për një rrymë heretike mendimi mbi misterin e Trinisë, që u përhap posaçërisht
në Kishat lindore gjatë shekullit IV. Të gjitha Kishat, që pranuan Besojmën niçeane
e konsideruan heretike. Sipas pneumatomakëve, Shpirti Shenjt nuk është Vetja e
tretë e Trinisë, sepse nuk e ka të njëjtin dinjitet hyjnor me Atin e me Birin. Ata
mendonin se Shpirti Shenjt, i krijuar nga Hyji, më i lartë se Engjëjt, nuk është i
njëgjëjtë me Atin, por i varur nga Ati e nga Biri. Pneumatomakia u njoh edhe me emrin
Maqedonizëm, sepse një nga përhapësit e saj të parë ishte Maqedoni i Kostantinopojës,
ipeshkëv, që jetoi rreth viteve 360 e që më parë kishte ndjekur me zell të madh mendimin
kristologjik arian. Koncili ngarkoi, pastaj, meshtarin Elpidi, për ta çuar letrën
në të gjitha vendet e Lindjes, për të studiuar kushtet, në të cilat jetohej feja në
këto vende dhe për të përhapur kudo të vërtetat ungjillore. Përcaktoi edhe normat
e parimet, që duheshin respektuar në zgjedhjen e ipeshkvijve, të priftërinjve e të
diakonëve. Porositi të zgjidheshin ndërmjet anëtarëve të klerit ose të gjykatësve,
që kishin një pozitë më të lartë e që njiheshin për ndershmërinë e tyre. Përjashtoheshin
nga ky rregull, ushtarakët e nëpunësit shtetëror, që mund të korruptoheshin më lehtë.
Vendimet e Koncilit u ratifikuan nga Perandori Valentiniani, i cili i shoqëroi me
letrën personale, drejtuar ipeshkvijve të Azisë, ku përshkruante mësimet themelore
të doktrinës së krishterë, duke shtuar se besimtarët lindorë dhe ipeshkvijtë nuk duhet
ta përligjnin qëndrimin e tyre mbi pohimin se ndiqnin fenë e perandorit Valenti (328-378),
mbrojtës i Arianëve, ndërsa Valentiniani ishte kundërshtar i tyre e mbrojtës i ortodoksisë1,
domethënë i fesë së vërtetë. Një përligjje e tillë nuk ishte tjetër, veçse shpërdorim
i autoritetit perandorak e, sidomos, mospranim i porosisë ungjillore: “Jepini Cezarit
çka i përket Cezarit, e Hyjit jepini çka i përket Hyjit”(Lk 20,25). Në këtë
letër, megjithëse kundër Valentit, pas emrit të Valentinianit, shënohej edhe emri
i tij e ai i Gracianit, sipas dokeve të perandorëve romakë, për të kujtuar në aktet
publike, dhe kolegët tyre të perandorisë. Teodoreti i Çiros (393-457) dëshmon se
ky Koncil u mblodh pas emërimit të Shën Ambrozit në krye të selisë së Milanos (dhjetor
374). Dihet historikisht edhe se Valentiniani e kaloi verën e vjeshtën e vitit
375 në Iliri, gjë që vërteton se ishte tejet i interesuar për punimet e këtij Koncili,
që u mbajt në praninë e tij. E kjo, sepse vendimet e Koncileve ndikonin fuqimisht
në vetë ushtrimin e pushtetit perandorak bizantin, njëkohësisht edhe pushtet kishtar.
Prandaj Kisha Katolike në Ilirikum do t’i ndjente fort të gjitha pasojat e mosmarrëveshjeve
juridike e doktrinore ndërmjet Romës e Kostantinopojës. Megjithëse mbi trojet ilirike
do të dyndeshin njëri pas tjetrit fiset barbare, ndërmjet të cilëve, sllavët, hierarkia
e Kishës katolike, tashmë e përforcuar, do të vijonte t’i përballonte vështirësitë
e këtyre kohëve të ndërlikuara, gjithnjë besnike e Selisë Apostolike të Romës. Kohë
të largëta e të mugëta, këto në të cilat u mbajtën Koncilet kishtare të Ilirisë. Pak
të dhëna arritën deri në ditën tona, nga një vend që u dogj e u poq në rrjedhë shekujsh,
i shkelur nga këmbë barbare. E megjithatë, diçka mbeti. Këtë po mundohemi ta kërkojmë
e ta ruajmë, përmes këtyre emisioneve. 1 Fjala "ortodoksi" vjen
nga greqishtja όρθος, "i drejtë", "korrekt" e δόξα, "opinion", "doktrinë". Mund të
përdoret me kuptime të ndryshme.