Сёння ў Івянцы завяршылася
Малітоўная сустрэча моладзі. Раніцай арцыбіскуп Тадэвуш Кандрусевіч Мітрапаліт Мінска-Магілёўскі
ўзначаліў Св. Імшу, пасля чаго ўдзельнікі даручылі сябе Маці Божай Беззаганай. У гэтым
годзе каля 250 чалавек сабраліся ў невялікім мястэчку ў Валожынскім раёне Мінскай
вобласці. Гэты форум сёлета адзначыў свой першы юбілей – стаў 5 па ліку. А “Музычная
майстэрня” – адна з галоўных частак моладзевага мерапрыемства – адзначыла ўжо 10-цігоддзе
з дня заснавання
Сюды прыязджаюць людзі, якія граюць у хрысціянскіх гуртах
або спяваюць у парафіяльных хорах. Не ўсе спачатку ведаюць нават асаблівасці літургіі.
Таму разам са спевамі атрымліваюць і веды. Пазнавальных мерапрыемстваў і для іншых
удзельнікаў сустрэчы было дастаткова. Канферэнцыі “Я адказны за Касцёл”, “Я ў каталіцкіх
СМІ”, размова с біскупамі. Учора амаль гадзіну на пытанні моладзі адказваў Мітрапаліт
Тадэвуш Кандрусевіч. З-за спякоты своеасаблівую прэс-канферэнцыю перанеслі ў касцёл
– за тоўстымі сценамі храма XVIII стагоддзя захоўваецца прахалода. Моладзь проста
засыпала пытаннямі арцыбіскупа – шмат было падрыхтавана раней і дасылалася па электроннай
поште, шмат – узнікала спантанна. Пыталіся аб манаскіх супольнасцях, аб музычных гуртах,
аб сям’і. На ўсе, прызнаўся мітрапаліт, ён адказваў шчыра і адкрыта.
“Шмат
пытанняў было на тэму сям’і, абароны жыцця і гэта добра, што людзі цікавяцца, асабліва
моладзь. Ведаем, што сёння дэмаграфічны крызіс закрануў многі краіны свету і Беларусь
у тым ліку. Таксама шмат пытанняў было адносна выкарыстання сродкаў масавай камунікацыі
ў справе евангелізацыі, жыцця Касцёла, ідэнтыфікацыі жыцця і гэтак далей. І моладзь
цікавіцца, яны хацелі браць большы ўдзел у гэтым. Справа валанцёрства закраналася.
Такія жыццёвыя пытанні дэманструюць, што моладзь, якая знаходзіцца тут, яна не стаіць
з боку ад Касцёла, гэта не гледачы, якія выключна крытыкуюць футбалістаў ці хакеістаў,
гэта члены Касцёла, удзельнікі Касцёла, удзельнікі касцёльнага жыцця”, - заўважыў
арцыбіскуп.
Але ў гэтым годзе форум меў і свае асаблівасці. Івянец стаў яшчэ
ядным пунктам маршрута крыжовага шляху-аўтапребегу ў абарону жыцця “Ад акіяну да акіяну”.
У касцёл валанцёры прывезлі копію іконы Маці Божай Чэнстахоўскай, якая стала святыняй
гэтай маштабнай акцыі. Да яе далучыліся ўжо дзве хрысціянскія Царквы – Праваслаўная
і Каталіцкая. Сутнасць – пранесці цудоўны абраз ад берагоў Ціхага да берагоў Атлантычнага
акіянаў і прыцягнуць увагу моладзі да Божага дару жыцця, што сёння адыходзіць на другі
план.
Шмат часу моладзь у Івянцы правяла пад аткрытым небам – жыла ў палатачным
гарадку, абедала ў палявой кухні. Рыцары перанеслі ўдзельнікаў у сярэднявечча – іх
з’яўленне сугучна з тэмай сустрэчы – “Я – рыцар Евангелля”. Сваімі ўражаннямі напрыканцы
3-дзённага форуму падзялілася Ксенія Смірнова.
“Гэта адпачынак, адпачынак
фізічны і духоўны ў першую чаргу. Нават гэтыя хвіліны цішыні падчас малітвы – яны
дзейнічаюць настолькі моцна, што я не ведаю, як апісаць. Я сама на самой справе плакала
і не ведала чаму. Сапраўды, чалавек такі забеганы ў сучасным свеце, што няма часу
спыніцца і падумацца над сваім жыццём і як жыць далей. І я цешуся вельмі, я прыязджаю
ўжо 5 год. Сапраўды, дзякуй усім і Пану Богу ў першую чаргу”, - сказала ўдзеліца форуму.
Сёння
ўдзельнікі малітоўнай сустрчы цёпла развіталіся, каб сустрэцца ў наступным годзе –
на тым жа месцы ў той жа летні час.