Гуманітарную дапамогу
для сірыйцаў папрасіў Бэнэдыкт XVI, выступаючы пасля малітвы “Анёл Панскі” у Кастэль
Гандольфа. Папа яшчэ раз заклікаў да мірнага вырашэння канфлікту на аснове дыялогу
і прымірэння, падкрэсліўшы, што з трывогай сочыць за трагічнымі падзеямі і эскалацыяй
насілля ў краіне, “сумным вынікам якіх з’яўляюцца забітыя і параненыя сярод грамадзянскага
насельніцтва” і велізарная колькасць бежанцаў у суседнія краіны. “Прашу аб забеспячэнні
іх неабходнай гуманітарнай дапамогай і салідарнасцю”, - заклікаў Святы Айцец. Пантыфік
запэўніў сірыйцаў у сваёй блізкасці і папрасіў у Бога мудрасці сэрца, асабліва для
тых, на кім ляжыць адказнасць выкарыстаць усе магчымасці для прымірэння, перш за ўсё
міжнароднай супольнасці.
Бэнэдыкт XVI узгадаў таксама іракскі народ, які пацярпеў
у апошнія дні ад вялікай колькасці тэрактаў, што прынеслі шматлікія смяротныя ахвяры.
“Хай гэтая вялікая краіна, знойдзе шлях стабільнасці, паяднання і міру”, - сказаў
Святы Айцец.