Рымскія Пантыфікі аб Алімпійскіх гульнях: заклік да маральных каштоўнасцяў у свеце
спорту
У нашу эпоху спорт
вельмі блізка ўвайшоў у штодзённае жыццё чалавецтва. Калі напрыканцы ХІХ ст. ім займалася
толькі каля 1% насельніцтва планеты, то сёння, і магчыма дзякуючы Алімпійскім гульням,
ён стаў сапраўдным глабальным феноменам. Канешне спорт і Алімпіяды не маглі застацца
па-за ўвагай Рымскіх Пантыфікаў, якія заўсёды імкнуліся выкарыстаць момант, каб звярнуцца
да спартсменаў і падкрэсліць маральнае вымярэнне гэтага заняцця. У 1960 г. Ян ХХІІІ
прыняў на аўдыенцыі атлетаў з 83 краін свету, з нагоды Алімпійскіх гульняў, якія праходзілі
у Рыме. У сваёй прамове Папа заклікаў спартсменаў сведчыць аб этычных цнотах звязаных
са светам спорту. “У развіцці алімпійскіх кампетэнцый давайце ўсім прыклад здаровых
здольнасцяў, без зайздрасці і варожасці і ў духу павагі адзін да аднаго. У барацьбе
паказвайце пастаянства і спакойную радасць, сціпласць пры перамогах, поспеху і ў цяжкасцях,
з якімі сустракаюцца сапраўдныя атлеты. Акрамя таго, сведчыце перад шматлікімі гледачамі
аб старажытнай прымаўцы: у здаровым целе здаровы дух”, - казаў Пантыфік.
Таксама
Павел VI звяртаўся да спартсменаў з нагоды Алімпійскіх гульняў у Манрэале ў 1976 г.
У сваёй прамове Пантыфік звяртаў увагу на тое, што Алімпійскія гульні павінны быць
святкаваннем сяброўства паміж народамі і святам міру.
Ян Павел ІІ, звяртаючыся
да кіраўнікоў Міжнароднага алімпійскага камітэта ў 1982 г. праслаўляў спартыўныя цноты
і асуджаў інструменталізацыю спорта для нажывы і дыскрымінацый. “Як сведчанне дзейнасці
чалавека, спорт павінен быць сапраўднай школай і пастаянным досведам лаяльнасці, шчырасці,
чэснасці, ахвярнасці, адвагі, імклівасці, салідарнасці, бескарыснасці, павагі. Але
калі ў свет спорту ўваходзяць насілле, несправядлівасць, падман, прага нажывы, эканамічнага
і палітычнага ціску, дыскрымінацый, тады ён становіцца звязаным з прыладамі сілы і
грошай”, - казаў Папа.
22 ліпеня свае пажаданні ў сувязі з Алімпійскімі гульнямі
ў Лондане выказаў таксама Бэнэдыкт XVI. Святы Айцец адзначыў, што Касцёл глядзіць
на Алімпійскія гульні з вялікай сімпатыяй і заклікаў вернікаў маліцца, каб цяперашняя
Алімпіяда стала “сапраўдным досведам братэрства паміж народамі Зямлі”.