Бэнэдыкт XVI азнаёміўся з вынікамі следства па справе ўцечак інфармацыі
Зала Друку Апостальскай
Сталіцы паінфармавала 27 ліпеня, што ў чацвер,26 ліпеня, раніцай Святы Айцец прыняў
на аўдыенцыі спецыяльную камісію кардыналаў, створаную для адміністрацыйнага расследавання
ўцечак канфідэнцыйнай інфармацыі. У склад камісіі ўваходзяць кардынал Хуліян Эранс,
яе старшыня, і кардыналы Ёзэф Томка і Сальватору дэ Джорджы. На сустрэчы з Папам прысутнічаў
таксама сакратар камісіі а. Луіджы Марціньяні, капуцын, а таксама прафесар П’еро Антоніа
Бонэ, следчы па справе, і прамотар справядлівасці, прафесар Мікола Пікардзі з Трыбуналу
Дзяржавы Ватыкан. Бэнэдыкт XVI быў праінфармаваны аб вывадах, да якіх прыйшла кардынальская
камісія, і выніках крымінальнай справы. Ён падзякаваў за інфармацыю і папрасіў ватыканскія
судовыя органы працягваць працу са стараннасцю.На нарадзе таксама прысутнічаў арцыбіскуп
Анджэла Бэчу, Субстытут Апостальскай Сталіцы, кс. прэлат Георг Генсвайн, асабісты
сакратар Святога Айца, Даменіка Джані, камандуючы Ватыканскай жандармерыяй, і Грэг
Бёрк, дарадца па камунікацыі Дзяржсакратарыяту.