Mesazh i dikasterit të Emigrantëve për Ditën Botërore të Turizmit: të kujdesemi për
ambientin dhe për energjinë
Më 27 shtatorin e ardhshëm kremtohet Dita Botërore e Turizmit, e cila sivjet ka si
temë “Turizmi dhe qëndrueshmëria energjitike: nxitës të zhvillimit”. Me këtë rast,
Këshilli Papnor i Baritorisë për Emigrantët dhe Endacakët, publikoi javën e kaluar
një mesazh, nënshkruar nga kryetari i dikasterit, kardinali Antonio Maria Veljò. Selia
e Shenjtë e konsideron këtë Ditë, në të cilën merr pjesë që nga themelimi, në vitin
1979, mundësi për të dialoguar me botën, duke ofruar kontributin e saj, bazuar në
Ungjillin e Krishtit. Energjia është në qendër të reflektimeve të këtij viti, i cili
i është kushtuar nga OKB-ja pikërisht mundësisë për t’i furnizuar të gjithë me një
energji, prodhimi i së cilës të mos e shkatërrojë ambientin, por përkundrazi ta ndihmojë
atë. Prandaj, mesazhi i Selisë së Shenjtë përqendrohet në ndikimin e turizmit
mbi ambientin, sidomos përsa i përket konsumit të burimeve energjitike dhe rritjes
së ndotjes. Duke pasur parasysh se në botë, sasia e energjisë nuk është pa fund, dokumenti
kërkon ndryshimin e mendësisë e të mënyrës së jetesës. Ky kthim mendjesh e zemrash,
nënvizohet në të, duhet t’i çojë të gjithë njerëzit drejt artit të bashkëjetesës,
që respekton alenacën ndërmjet njeriut e natyrës. Shoqëria e sotme, e përqendruar
mbi konsumin, krijon indiferencë për dëmet që ai lë pas, denoncon Këshilli Papnor
për Emigrantët e Endacakët. Mbrojtja e ambientit është jo vetëm sfidë për krejt njerëzimin,
por edhe detyrë e rëndësishme për të mirën e përbashkët.