Կիրակնօրեայ Կրթօճախներու Ուսուցիչներու Վերապատրաստման Դասընթացք՝ Ծաղկաձորի Մէջ:

Գարեգին Բ. Ամենայն Հայոց Կաթողիկոսի օրհնութեամբ՝ Մայր Աթոռ Սուրբ Էջմիածնի Քրիստոնէական դաստիարակութեան կեդրոնը World Vision միջազգային քրիստոնէական բարեգործական կազմակերպութեան հայաստանեան գրասենեակին աջակցութեամբ՝ Յուլիս 16-21 Ծաղկաձորի Գրողներու տան մէջ իրականացուցած է կիրակնօրեայ կրթօճախներու ուսուցիչներու վերապատրաստման դասընթացք։ Այս մասին կը յայտնեն Մայր Աթոռ Սուրբ Էջմիածնի Քրիստոնէական դաստիարակութեան կեդրոնէն:
Ծրագրին մէջ ընդգրկուած էր շուրջ 150 ուսուցիչ՝ հայաստանեան բոլոր թեմերէն:
Դասընթացքի մեկնարկին բացման խօսքով հանդէս եկած է Մայր Աթոռի ՔԴԿ տնօրէն Տ. Վարդան աբեղայ Նաւասարդեան եւ , World Vision-ի հայաստանեան գրասենեակի` ՀՀ կառավարութեան եւ Եկեղեցւոյ հետ կապերու պատասխանատու տիկ. Կարինէ Յարութիւնեան, որոնք, երկուստէք կարեւոր համարելով կառոյցներուն արդիւնաւէտ համագործակցութիւնը, յոյս յայտնած են, որ անիկա պիտի ըլլայ շարունակական եւ առաւել ընդգրկուն:

Դասընթացքի օրակարգին մէջ ընդգրկուած էին Հայ Առաքելական Սուրբ Եկեղեցւոյ դաւանաբանութեան, Սուրբ Գրքի եւ եկեղեցաբանական տարաբնոյթ հարցերու վերաբերեալ դասախօսութիւններ, որոնք ներկայացուած են ինչպէս հոգեւորականներու, այնպէս ալ աշխարհական մասնագէտ բանախօսներու կողմէ:
Առաջին անգամ դասընթացքի ծիրէն ներս Արարատեան Հայրապետական եւ Արմաւիրի թեմերու ուսուցիչները ներկայացուցած են օրինակելի դասեր, որոնց հետեւած են մեթոտական քննարկումներ:

Դասընթացքի աւարտին ուսուցիչները Կեչառիսի վանքին մէջ մասնակցած են ուխտի Սուրբ Պատարագին: