Папа спачувае ў сувязі з гібеллю кубінскага дысідэнта Асвальда Пая
Бэнэдыкт XVI выказаў
свае спачуванні ў сувязі з гібеллю кубінскага дысідэнта, хрысціянскага дэмакрата,
Асвальда Пая. Ён загінуў у аўтакатастрофе ў нядзелю каля горада Баямо падчас наведвання
правінцыі Гранма. Спачувальну тэлеграму ад імя Папы скіраваў Субстытут Апостальскай
Сталіцы арцыбіскуп Анжэла Бэчу. У тэлеграме на імя кардынала Хаймэ Артэгі, арцыбіскупа
Гаваны, адзначаецца, што Бэнэдыкт XVI перадае свае шчырыя спачуванні і выказвае духоўную
блізкасць сям’і заўчасна памерлага. Папа ўзносіць да Бога гарачую малітву аб вечным
супакоі Асвальда Пая і просіць супакою і сілы ў гэты час смутку для тых, хто аплаквае
незаменную страту. 60-гадовы лідэр Хрысціянска-дэмакратычнага руху быў сузаснавальнікам
праекта “Варэла” – петыцыі аб правядзенні рэферэндуму па адмене аднапартыйнай сістэмы
на Кубе. Асвальда Пая быў найбольш выбітнай фігурай палітычнай апазіцыі ў краіне.
Ён быў добрым прыкладам таго, як дасягнуць сваёй мэты, не звяртаючыся да насілля,
за што стаў лаўрэатам Міжнароднай прэміі Сахарава – узнагароды для праваабаронцаў,
якую заснаваў Еўрапарламент. Яго кандыдатуру таксама двойчы вылучалі на Нобелеўскую
прэмію міру.