Հրապարակուած է Միացեալ Ազգերու Կազմակերպութեան Ընդհանուր Քարտուղար Պան Քի Մունի «Աւանդական
Սպառազինութիւններու Վերահսկումը՝ Տարածաշրջանային ու Ենթատարածաշրջանային Մակարդակներով»
զեկոյցը, որուն մէջ ներկայացուած է նաեւ Հարաւային Կովկասի մէջ սպառազինութիւններու հետ
կապուած իրավիճակը: Զեկոյցին մէջ մասնաւորապէս կը նշուի, թէ Ատրպէյճան սպառազինութիւններ
գնելու վտանգաւոր արշաւի մը սկսած է, խախտելով երկիրին վերապահուած զէնքերուն թիւերը,
որոնք սահմանուած են Եւրոպայի մէջ աւանդական սպառազինութիւններու մասին պայմանագիրով: «Ատրպէճան
գերազանցած է պայմանագիրով սահմանափակուած երեք տեսակի սպառազինութիւններու քանակը: Ատրպէյճանցիները
ունին 381 մարտական հրասայլ՝ (թոյլատրելի 220ին փոխարէն) հրետանային սպառազինութեան 518
միաւոր՝ (թոյլատրելի 285ի փոխարէն) եւ 287 մարտական զրահամեքենայ (թոյլատրելի 220ի
փոխարէն) նշուած է զեկոյցին մէջ: «Ատրպէյճանի անհետեւողական քաղաքականութիւնը բացասական
մեծ ազդեցութիւն կ՛ունենայ տարածաշրջանին մէջ վստահութեան ու համագործակցութեան մթնոլորտի
ձեւաւորման ուղղուած Հայաստանի ջանքերուն վրայ», գրուած է ՄԱԿ-ի զեկոյցին մէջ: