“Няведанне ісціны
з’яўляецца самай сур’ёзнай формай беднасці сучаснага чалавека”, - заявіў кардынал
Маўра Пьячэнца, прэфект Кангрэгацыі па справах Духавенства падчас фестывалю газеты
італьянскага епіскапату “Avvenire”, які прайшоў сёлета ў мясцовасці Лерычы. У гэтым
годзе яго тэма гучала “Сведкі часу, сведкі ў часе”. Словы кардынала былі скіраваны
ў першую чаргу да журналістаў, і, у прыватнасці, католікаў, працуючых у сродках масавай
інфармацыі.
Ватыканскі іерарх падкрэсліў той факт, што сітуацыю сучаснага
чалавека можна акрэсліць евангельскім сцвярджэннем аб натоўпе без пастыра. “Сённяшні
чалавек - сказаў ён, - у часы дыктатуры рэлятывізму, стаў не ў стане распазнаць сэнс,
значэнне і магчымыя наступствы ўлады розных элементаў”. Паводле кардынала, чалавек
трапіў у залежнасць ад сваіх інстынктаў і эмоцый, “якія хітра былі ўзведзены ў стан
канчатковага крытэрыя праўды”.
Роля журналіста-католіка, на думку іерарха,
навучыць чалавека адрозніваць праўду ад падману, і такім чынам выратаваць яго. Кардынал
Пьячэнца не пабаяўся назваць гэта “барацьбой з гарманальнай тэорыяй пазнання, у якой
чалавек зводзіцца да аднаго вымярэння, вядома, недастойнага яго годнасці і велічы”.
“Католік
любіць рэальнасць, і яго прыналежнасць да Хрыста не перашкаджае яму пазнаваць яе,
ацэньваць і несці іншым”, - лічыць ватыканскі іерарх. Паводле яго, быццё католікам
не прымяншае быцця аб’ектыўным. Кардынал нагадаў, што католік-журналіст не павінен
разменьваць прыбытак на пазітыўнасць навіны. Бо сёння, на жаль, лепш прадаюцца навіны
негатыўныя, заключыў іерарх, намякаючы на сітуацыю з так званымі “Vatileaks”.