Ban Ki Mun kërkon dialogun për Kosovë

Sekretari i përgjithshëm i Organizatës së Kombeve të Bashkuara, Ban Ki Mun, mbështet vazhdimin e dialogut mes Prishtinës e Beogradit. Në një deklaratë për gazetarë, dhënë në aeroportin e Prishtinës, Ban Ki Mun foli qartë se dialogu ka qenë në qendër të bisedimeve të tij me autoritetet e Beogradit dhe të Prishtinës.
Ban Ki Mun shprehu shqetësimin e tij lidhur me tensionet politike në veri të Kosovës dhe ka theksuar se të gjitha mosmarrëveshjet duhet të zgjidhen me dialog. Ai theksoi edhe nevojën e pajtimit ndëretnik e atë të ndërtimit të besimit midis komuniteteve dhe u bëri thirrje autoriteteve të Prishtinës e të Beogradit që të përqendrohen në këtë çështje.
Pastaj Sekretari i Përgjithshëm i Organizatës së Kombeve të Bashkuara u bëri thirrje autoriteteve të Prishtinës që të punojnë me përkushtim për ndërtimin e institucioneve demokratike në Vend. Gjatë qëndrimit në Prishtinë, Ban Ki Mun zhvilloi një takime me Presidenten e vendit Atifete Jahjaga, dhe me kryeministrin Hashim Thaçi. Takimi u zhvillua në ambientet e aeroportit të Prishtinës. Ban KI Mun pastaj vizitoi UNMIK-un, Deçanin e Prizrenin.