Святы Пасад заклікае СМІ публікаваць толькі правераную і дакладную інфармацыю
Кс. Фэдэрыка Ламбардзі,
пракаментаваў публікацыю італьянскім выданнем “La Repubblica” артыкулу аб крадзяжы
і перадачы журналістам асабістых дакументаў Бэнэдыкта XVI. Кіраўнік Залы Друку заўважыў,
што “La Repubblica” дакладна перадрукавала некаторыя часткі артыкула ў нямецкім “Die
Welt” ад 15 ліпеня. Ён адзначыў, што гэты артыкул не быў успрыняты сур’ёзна ў нямецкай
прэсе з прычыны яго недакладнасці і адсутнасці аб’ектыўных доказаў. Кс. Ламбардзі
патлумачыў, што менавіта па гэтай прычыне Апостальская Сталіца не каментавала яго.
Прадстаўнік Святога Пасаду ўдакладніў, што змешчаная ў артыкуле інфармацыя аб трох
новых абвінавачаных у крадзяжы дакументаў, не адпавядае рэчаіснасці, а тое, што ў
ходзе раследвання апытваліся тыя ці іншыя людзі, не азначае, што яны абвінавачваюцца
ў злачынстве. Кіраўнік Залы Друку таксама дадаў, што ён інфармаваў журналістаў аб
сітуацыі вакол крадзяжу дакументаў з улікам павагі да таямніцы следства і толькі тады,
калі валодаў выключна аб’ектыўнымі і пацверджанымі фактамі. Кс. Ламбардзі падкрэсліў,
што на працягу гэтага часу выданне “La Repubblica” змяшчала на сваіх старонках артыкулы
з фальшывай інфармацыяй і прывёў некалькі прыкладаў: інтэрв’ю з жонкай Паўла Габрыэле,
якога на самой справе не было; інтэрв’ю з невядомым іерархам Касцёла, які нібыта сцвярджаў
аб існаванні неіснуючай групы “дакладчыкаў”, якімі кіруе жанчына і якія павінны звярнуцца
асабіста да Папы; артыкул аб “хакеры”, які нібыта таямніча знік з Ватыкана; публікацыя
імёнаў трох кардыналаў, якія нібыта падазраваліся па справе выкрадання дакументаў;
і нарэшце апошні артыкул, перадрукаваны з нямецкага выдання, у якім гаворыцца аб нібыта
існуючых трох падазраваных у крадзяжы дакументаў Пантыфіка. “У такой складанай і тонкай
тэме як гэта, мне здаецца, што чытачы аднаго з самых шматтыражных італьянскіх выданняў
заслугоўваюць павагі, звязанай з дакладнасцю і праверанасцю інфармацыі”, - адзначыў
кс. Ламбардзі.