Гадавіна аднаўлення Лацінскага Патрыярхату ў Іерусаліме
Сёння, 23 ліпеня 2012
г., спаўняецца 165 гадоў аднаўлення Лацінскага Патрыярхату ў Іерусаліме. 23 ліпеня
1847 г. папа Пій IX скіраваў Апостальскі ліст “Nulla celebrior”, якім замацаваў гэта
рашэнне. У ім Святы Ацец адзначаў непаўторнасць і важнасць для хрысціян гэтага палестынскага
гораду, “што змяшчае вядомыя помнікі, сведкі падзей, ў якіх браў удзел Пан наш Езус
Хрыстус”, - напісаў Папа. Пантыфік узгадаў багатую і драматычную гісторыю Іерусаліма,
які цярпеў ад шматлікіх войнаў, у тым ліку рэлігійных, быў захоплены мусульманамі,
што зрабіла немагчымым прабыванне ў ім каталіцкай іерархіі і існавання якіх-кольвечы
структур.
“У цяперашні час прычын, якія перашкаджалі Лацінскаму Патрыярху
Іерусаліма пражываць у сваёй дыяцэзіі для акармлення паствы ўжо не існуе”, - сцвярджаў
Пій IX у 1847 г. Пантыфік перадаў пад юрысдыкцыю Патрыярха таксама Кустодыю Святой
Зямлі Братоў Меншых і даручыў Кангрэгацыі Распаўсюджвання Веры (сёння Кангрэгацыя
Евангелізацыі Народаў), здзяйсняць каардынацыю сувязі Лацінскага Патрыярхату з Апостальскай
Сталіцай.