Dalja e dokumenteve të rezervuara. Dënim i Sekretarisë së Shetit të Vatikanit përballë
akuzave të rreme për bashkëpunim. Notë e ashpër e atë Lombardit.
Selia e Shenjtë reagon ashpër kundër akuzave të rreme për bashkëpunim, lidhur me daljen
e dokumenteve të rezervuara nga Vatikani, botuar në dy gazeta. Sekretaria e Shtetit
i dënon plotësisht, ndërsa Atë Lombardi boton një notë kundër gazetës “La Repubblica”.
Përgënjështrim
i ri, i prerë, i drejtorit të Sallës vatikanase të Shtypit, atë Federiko Lombardi,
lidhur me daljen e dokumenteve të rezervuara nga Vatikani: ka të bëjë, për të disatën
herë, me gazetën italiane ‘La Repubblica’, e cila boton sot një shkrim, që s’është
tjetër, veçse kopje e një shërbimi, marrë nga gazeta Die Welt. Nuk është ky informacioni,
që pret, me të drejtë, publiku. Po japim, më poshtë, pjesën kryesore të tekstit:
“Artikulli
i Republikës së sotme mbi çështjen e daljes së dokumenteve nga Vatikani rikopjon,
(në disa raste dhe fjalë për fjalë, e jo vetëm citimet përfundimtare), një artikull,
nënshkruar nga Paul Badde, botuar në Die Welt online, një javë më parë (15 korrik),
pa shtuar asgjë të re, përveç ca argumenteve të parëndësishme e të interpretuara fare
pa bazë. Njoftoj se artikulli i Die Welt nuk ngjalli interesin e shtypit gjerman,
prej këndej, nuk u ribotua, sepse autorët, duke mbajtur qëndrim të njëanshëm, kishin
marrë mbi vete edhe përgjegjësinë e rëndë të vinin gishtin mbi disa njerëz, duke i
konsideruar si përgjegjës për ngjarjet, pa asnjë argument objektiv. Prandaj, shton
atë Lombardi, nuk m’u duk e arsyeshme të kundërveproj vendosmërisht. Në vijim,
drejtori i Sallës vatikanase të Shtypit sintetizon gjithë rrugën, që është ndjekur
nga komisioni hetimor, duke shpjeguar se të pyetesh nga ky komision, nuk do të thotë
në asnjë mënyrë të jesh i dyshuar. Prej këndej, tre personat, emrat e të cilëve kujtohen
në artikull (kardinali Paolo Sardi; zonja Ingrid Stampa dhe imzot Jozef Klemens),
mund të jenë dëgjuar, por kjo nuk do të thotë aspak se dyshohen për bashkëfajësi (siç
pohon – fakt tejet i rëndë, vënia e kësaj hamendjeje në faqen e parë të gazetës).
Përgjegjësi tejet e rëndë të hedhësh, pa asnjë bazë, hijen e dyshimit mbi njerëz të
denjë për respekt, që i kanë shërbyer Atit të Shenjtë për shumë vjet e me përkushtim
të plotë. Frazën e kardinalit Herranz mbi “të papriturat” e hetimit, gazeta e interpreton
në kuptimin e saj të kundërt. Të papritura, sipas Hirësisë së Tij, do ishin përfundimet,
në kundërshtim të plotë me atë që prisnin e përfytyronin gazetarët, pas shpjegimeve
të tyre të pabazuara. E kjo vlen edhe për artikullin. ... Në një temë të ndërlikuar
e delikate si kjo, më duket se lexuesit italianë të njërës nga gazetat më të përhapura,
do të meritonin shumë më tepër respekt, korrektësi e deontologji informacioni”, pëfundon
atë Lombardi.