Papa: djalli mbjell grindje e përçarje, Zoti ofron paqe
“I keqi mbjell grindje; Zoti krijon paqe!”: Ky është mesazhi që Papa Benedikti XVI
bëri sot në çastin e lutjes së Engjëllit të Tënzot në selinë papnore në Kastel Gandolfo.
“Në të vërtet – tha Papa duke fol para besimtarëve të mbledhur në oborrin e Pallatit
apostolik -, i keqi gjithmonë mundohet të shkatërron veprën e Zotit, duke mbjell ndarje
e përçarje në zemrën e njeriut, ndërmjet trupit e shpirtit, ndërmjet njeriut e Zotit,
në marrëdhëniet ndërpersonale, shoqërore, ndërkombëtare, e edhe ndërmjet njeriut e
krijimit”. Reflektimi i Papës ishte festa e sotme liturgjike e Marisë Magdalenë,
e cila qe shpëtuar nga Jezusi “nga shërbimi e nënshtrimi i plotë ndaj të keqit (djallit)”.
“Në çka qëndron – pyeti Papa Ratcinger – shërimi i thellë që Hyji bëri përmes Jezusit?
Është në paqen e vërtetë, të plotë, fryt i pajtimit të njeriut me vetveten e në të
gjitha marrëdhëniet e tij: me Zotin, me të tjerët, me botën”. Sipas Benediktit XVI,
leximet biblike të kësaj së diele të 16-të gjatë vitit kishtar, na kujtojnë se Zoti
e do jetën për ne, Ai do të na udhëheq në kullota të mira, ku të mund të ushqehemi
e të pushojmë; nuk do që të birremi e të vdesim, por t’ia arrijmë cakut të udhës sonë,
që është plotësia e jetës”. “Është pikërisht kjo dëshira e çdo babai dhe e çdo nëne
që kanë për fëmijët e tyre – shtoi Papa -: e mira, lumturia, realizimi”. Duke cituar
pastaj letrën e shën Palit drejtuar Efesianëve, Papa teolog shtoi: “Madje, Krishti
është paqja jonë, Ai që prej dy popujve bëri një, e përmbysi murin ndarës, domethënë
armiqësinë, në trupin e vet”. E para përfundimit të reflektimit të tij me lutjen
drejtuar “Marisë, Nënës së Krishtit paqes sonë, që të lutet për ne!”, Jozef Ratcinger
shtoi se “Fjala e Zotit e kësaj së diele na propozon një temë themelore e përherë
tërheqëse të Biblës: na kujton se Zoti është Bariu i njerëzimit”. “Kjo – vërejti –
do të thotë që Zoti na prin udhës së jetës së vërtetë e të plotë”.