Kryeipeshkvi i Parisit u takua me presidentin Hollande
Laiciteti, martesat mes personave me të njëjtin seks, kurimi në fund të jetës dhe
eutanazia: këto ishin temat e trajtuara gjatë takimit të së martës, ndërmjet kardinalit
André Vingt-Trois, kryeipeshkëv i Parisit dhe kryetar i Konferencës Ipeshkvnore Franceze,
dhe presidentit të ri të Republikës, François Hollande në Elize. Sipas kryeipeshkvit,
presidenti tregoi interes të madh për qëndrimin e Kishës Katolike përsa u përket këtyre
temave. Paraditen e së martës, ai kishte vizituar njërën nga institucionet e Kishës
për personat me sëmundje në gradë të fundit dhe shprehu admirim për punën, që bëhej
brenda atyre mureve. Përsa u përket martesave gay, kreu i Konferencës Ipeshkvnore
Franceze nënvizoi para presidentit se “martesa nuk është mjet për të njohur publikisht
vërtetësinë e lidhjeve ndërmjet dy personave, që duhen. Është një institucion shoqëror,
i cili siguron, në mënyrën më të mirë të mundshme, edukimin e fëmijëve… Prandaj nuk
duhen përzierë institucionet”. Presidenti Hollande theksoi se dëshiron të njohë opinionin
e të gjitha feve të pranishme në vend, pasi vetëm kështu mund të hartohet një projekt
për të ardhmen, i pëlqyeshëm nga të gjithë.