Don Lush Gjergji: Ali Podrimja poeti ynë i idealeve të përjetshme
Vdekja - kalimi në amshim - lartësim për Poetin Ali Podrimja! Prej ditës së djeshme
isha në ankth dhe ethe të pritjes dhe të frikës... Ndodhi ajo që shpresoje se nuk
do të jetë e vërtetë, vdekja e papritur e Mikut, Vëllait, Poetit, Mendimtarit, Mjeshtrit
të vargut dhe të mendimit, Ali Podrimja... Jam i tronditur në shpirt, dhe në "lundrime
në kujtime" i kujtoj më se 40 vjet njohurie, takime, bashkëpunime, vëllazërie në pjesët
e ndryshme të Kosovës, por edhe jashtë saj. Jam i lumtur e mirënjohës që kam njohur
e bashkëpunuar në shumë raste, lëmi, veçmas rreth përpilimit të librit "Lule për Nënën",
ku ai, i ndjeri Fahredin Gunga e i ndjeri Rifat Kukaj kanë dhënë "pjesën më të mirë
të vetvetes" do të thoshte Nënë Tereza. Ali Podrimja ishte Gjeniu i poezisë shqipe,
Njeriu i cili e personifikoi vuajtjen, dhembjen, pikëllimin e Popullit tonë nëpërmjet
Lumit. Pas vdekjes së Lumit besimi në jetë, në të tashmen dhe të ardhmen, në Zot
e në amshim, te Aliu ynë ishte edhe më i madh e i pathyeshëm. Dhe pikërisht për
këtë vdekja nuk e "korrë", edhe më pak e rrëmben, aspak nuk e rrënon dhe asgjëson
Poetin tonë të dashur - Ali Podrimja, por atë e Lartëson e përfundimisht e bën të
pavdekshëm. Për çdo fjalë, resht, mendim, porosi, mbi të gjitha për ngrohtësi e
vëllazëri, për bashkëndarje të shumë ideve e idealeve të jetës e të veprimtarisë,
Zoti të shpërbleftë, populli me nderim, dashuri e falënderim të kujtoftë! Pusho
në paqe e mos na harro! Don Lush GJERGJI