Raporti i Moneyval lavdëron Vatikanin për masat kundër riciklimit
Priteshin sot me padurim rezultatet e raportit të parë evropian, që vlerëson masat
e Shtetit të Vatikanit për parandalimin e riciklimit të parave dhe të financimit të
terrorizmit. Dokumenti, i hartuar nga një Komitet i veçantë i “Moneyval”-it të Këshillit
të Evropës, u komentua në Sallën e Shtypit të Selisë së Shenjtë, nga zv.sekretari
për Marrëdhëniet me Shtetet, imzot Etore Balestrero. Sipas tij, Vatikani është
vlerësuar pozitivisht në nëntë nga 16 rekomandimet kryesore. Sqarojmë se rekomandimet
evropiane janë gjithsej 45, jo të gjitha njësoj të rëndësishme. 22 prej tyre janë
plotësuar katërcipërisht, ndërsa 23 të tjera akoma duhen zbatuar. Imzot Balestrero
vuri në dukje sidomos shtatë zona kritike, për të cilat Vatikani impenjohet të arrijë
së shpejti standartet ndërkombëtare: “Raporti i publikuar sot përfaqëson një
gur të rëndësishëm kilometrik në rrugën për bashkimin e impenjimit moral të Selisë
së Shenjtë me teknologjinë më të sofistikuar”. Rrugë, e nisur që në fund të
vitit 2010, me miratimin e ligjit 127 të Vatikanit për parandalimin e riciklimit dhe
të financimit të terrorizmit. Ky ligj hyri në fuqi në prill 2011, ndërsa që në shkurt,
Selia e Shenjtë kërkoi vlerësimin e Moneyval-it. “Rruga e gjatë, bërë në një periudhë
kohe shumë të shkurtër – nënvizohet në raportin evropian – flet pozitivisht për Selinë
e Shenjtë, përsa u përket aspekteve të rëndësishme si riciklimi i parave, masat e
konfiskimit, ligji mbi lirinë e veprimit, dokumentet, asistenca ligjore e ndërsjelltë,
trajtimi penal i financimit të terrorizmit, bashkëpunimi ndërkombëtar, ratifikimi
i Konventave të OKB-së në këtë fushë”. Nga ana tjetër, Moneyval kërkon të forcohet
baza legjislative për kontrollin, duke vënë në dukje mungesën e qartësisë në rolin,
përgjegjësinë, autoritetin, pushtetin dhe pavarësinë e Autoritetit për Informacionin
Financiar, i cili po punon që nga qershori i vitit 2011 si mbikqyrës i veprimtarisë
ekonomike të Vatikanit. Gjithashtu, i kërkon Institutit për Veprat Fetare (IOR) të
fiksojë norma të qarta për ata që kanë të drejtë të hapin një llogari bankare pranë
tij. Imzot Balestrero përfundoi me fjalët: “Kemi bërë pra, një hap përfundimtar,
duke i ndërtuar themele të forta e të qëndrueshme shtëpisë, ose sistemit për luftën
kundër riciklimit e financimit të terrorizmit. Tani duam ta ngremë krejt ndërtesën,
e cila tregon vullnetin e Selisë së Shenjtë dhe të Shtetit të Vatikanit për të qenë
partnerë të besueshëm të bashkësisë ndërkombëtare”.