Прэзідэнт Італіі Джорджыа
Напалетана адзначыў, што за 6 гадоў яго знаходжання на высокай пасадзе, адным з самых
цудоўных досведаў сталі адносіны з Бэнэдыктам XVI. У інтэрв’ю “L’Ossevatore Romano”
палітык падкрэсліў, што з Папам іх аб’ядноўвае шмат агульнага, а таксама пачуццё
вялікай і ўзаемнай павагі. “Але ёсць таксама нешта большае, што кранае нашы чалавечыя
ніці”, - адзначыў Прэзідэнт Італіі. Ён расказаў, што пасля канцэрту араба-ізраільскага
аркестра “Заходне-усходні дыван”, які прайшоў 11 ліпеня ў Кастэль-Гандольфа з нагоды
імянін Пантыфіка, яны разам спацыравалі і “размаўлялі як асобы, якіх аб’ядноўвае блізкае
сяброўства, з улікам усіх адметнасцяў”, якія “звязаны з высокім служэннем і місіяй”
Бэнэдыкта XVI. “Мы адчуваем сябе блізкімі людзьмі ў пэўным сэнсе таму, што пакліканы
кіраваць вельмі складанымі рэальнасцямі. Папа, канешне, акрамя таго, што з’яўляецца
“кіраўніком дзяржавы”, перш за ўсё – глава Паўсюднага Касцёла. А я ўзначальваю інстытуты
Італьянскай Рэспублікі ў вельмі складаны перыяд”, - сказаў Напалетана. Ён падкрэсліў,
што ў такіх умовах абодва кіраўнікі пакліканы быць носьбітамі і натхняльнікамі спакою
і згоды. “Я вельмі адчуваю гэту маю місію – быць мадэратарам: не казажучы ўжо аб аналагічнай
місіі Пантыфіка”, - прызнаўся італьянскі прэзідэнт.
Гаворачы аб адносінах Бэнэдыкта
XVI да Італіі, Джорджыа Напалетана, узгадаў аб пасланні Святога Айца з нагоды 150-годдзя
аб’яднання краіны. “Я нашу яго і буду насіць заўсёды з сабой, як спадчыну майго прэзідэнцкага
мандата”, - сказаў палітык. Ён лічыць, што замест фармальнага паслання, Папа скіраваў
вельмі глыбокія словы, а таксама выразіў свой погляд адносна гістарычных падзей. “Гэта
па-сапраўднаму паказвае, як Італія, дзяржава і Касцёл, народ рэспублікі і народ Касцёла,
глыбока і блізка паяднаныя”, - сказаў Напалетана.