Kardinal Ravasi: Muzika është shenjë se ende ka drejtësi, dashuri e paqe në botë.
Për koncertin e mbrëmshëm mbajtur në Kastel Gandolfo foli edhe kardinali Xhanfranko
Ravazi, kryetar i Këshillit Papnor të Kulturës, duke hapur veprimtarinë muzikore.
Ajo që i bashkon këta instrumentistë të rinj hebrenj, të krishterë e myslimanë të
West-Eastern Divan Orchester nën drejtimin e mjeshtrit Daniel Barenboim, theksoi Hirësia
e Tij, nuk është vetëm besimi në të njëjtin Zot, por edhe besimi në forcën e artit
muzikor, gjuhë universale e njerëzimit. E muzika na kujton se, pavarësisht nga trazirat
e kohës, në botë ka ende drejtësi, dashuri e paqe. “Këta të rinj instrumentistë
të orkestrës – tha kardinal Ravasi – janë simbol i gjallë i tri kulturave të mëdha
fetare të Tokës së Shenjtë, asaj hebraike, të krishterë e myslimane. Ajo që i bashkon
nuk është vetëm feja në një Hyj të vetëm e rrënja e përbashkët abrahamitike, por edhe
muzika, e cila është gjuhë e vërtetë universale e njerëzimit”. Kardinal Ravasi
citoi tre shkrimtarë të tri feve të përmendura, myslimanin Rumi, hebreun Elie Wiesel
e të krishterin Aurelio Cassiodoro: posaçërisht ky i fundit na qorton në veprën e
tij ‘Institutiones’, që “ nëse do të vazhdojmë të bëjmë vepra të padrejta, Zoti do
të na le pas muzikë”.