Ëndrra e realizuar e katër mirditorëve

Shqipëri Arti 2012: ky është titulli i një ekspozite të katër piktorëve mirditorë që u hap më 11 korrik, në Romë, pranë galerisë Roma La Pigna. Me mbështetje të Unionit Katolikë të Artistëve Italianë, katër piktorë nga Mirdita: Ndue Marku, Pjetër Marku, Gjok Pepa e Fran Prenga realizuan ëndrrën e tyre, atë të shpalosjes së pikturave të tyre para publikut romak e ndërkombëtar, në qendër të kryeqytetit italian, për të shpreh pasurinë e natyrës dhe të shpirtit mirditor, së bashku me vlerat kombëtare e shpirtërore, të ruajtura e të kultivuara me shekujt, madje edhe në periudhat më të vështira e të errëta të historisë që përjetoi kombi shqiptar.
Pikurat e katër mirditorëve me dritën dhe ngjyrat e tyre të forta përshkruajnë natyrën mahnitëse të Mirditës, traditat kombëtare, vlerat e shpirtit fisnik të këtij populli. Janë himn kushtuar tokës e qiellit, shkëlqim i diellit e i hënës që shijohet në viset mirditore. Këto piktura paraqesin dritën, ujin, gjithësinë e tërë mirditore, trup e shpirt, Fe e Atdhe.
Pak para hapjes së ekspozitës, katër piktorët mirditorë vizituan redaksinë shqipe të Radio Vatikanit dhe ne përfituam nga rasti për folur me ta për këtë ngjarje arti me vlerë, e cila realizohet edhe në kuadrin e kremtimeve të 100 vjetorit të Pavarësisë së Shqipërisë, për çka Mirdita ka dhënë një kontribut vendimtar.Ta dëgjojmë bisedën që zhvilluam me piktorët bashkëkohorë nga Mirdita............