“L’Osservatore Romano” аб кнізе арцыбіскупа Гуджэроцці

У італьянскіх кнігарнях з’явілася кніга “Каўказ і наваколлі. Падарожжа да хрысціянства на памежжы”, аўтарам якой з’яўляецца арцыбіскуп Клаўдыё Гуджэроцці, Апостальскі нунцый у Рэспубліцы Беларусь, які да гэтага быў дыпламатычным прадстаўніком Апостальскай Сталіцы ў Грузіі, Арменіі і Азербайджане. Ватыканскае выданне “L’Osservatore Romano” адзначае, што аўтар глыбока пазнаёміўся з мовамі, духоўнасцю, звычаямі і гісторыяй рэгіёна, для чаго была неабходна “асаблівая любоў”. У кнізе арцыбіскупа Гуджэроцці апавядаецца аб гісторыі культуры, тэалогіі, літургіі і духоўнасці каўказкіх народаў. Ён падкрэслівае асаблівае знаходжанне Арменіі і Грузіі, “на памежжы хрысціянства” і адзначае, што менавіта ў сувязі з гэтым магчыма зразумець па-сапраўднаму іх культуры.

Арцыбіскуп апавядае аб творах і жыцці двух выдатных прадстаўнікоў армянскага і грузінскага народаў: містыка Грыгорыя з Нарэка і паэта Шота Руставэллі. Ватыканскае выданне адзначае, што ў арцыбіскупа Гуджэроцці атрымалася фундаментальна зразумець значэнне іх слоў і перадаць з дапамогай шматлікіх сінонімаў, лацінізмаў і неалагізмаў.