Арцыбіскуп Мюлер: мая місія – дапамагаць навучанню Папы
Арцыбіскуп Герхард
Людвіг Мюлер, новы прэфект Кангрэгацыі Веравучэння, прызнаўся, што бачыць у сваім
прызначэнні вельмі яснае заданне: дапамагаць навучанню Папы, які з’яўляецца настаўнікам
Паўсюднага Касцёла, даверанага св. Пятру і апосталам. “Зарам мы жывем у нялёгкія часы
і ўсе трохі пакутуем ад секулярызма, але мы не павінны забываць аб трасцэндэнтным
вымярэнні, скіраванасці на Бога, а таксама, што вельмі важна для мяне асабіста, развіцці
атмасферы блізкасці ва ўсім Касцёле і тут, у Рымскай Курыі, перш за ўсё ў Рымскім
Касцёле. Тое, што застаецца вельмі важным – гэта малітва за іншых, супольны удзел
у літургіі, любоў да бліжніх і любоў да Бога. У гэтым заключаецца сэнс, цэнтр хрысціянскай
веры: калі хочам сказаць, што такое хрысціянства, можна сказаць, што гэта любоў да
Бога і любоў да бліжняга. А дзе гэты бліжні? Тут, побач са мной”, - сказаў арцыбіскуп
Мюллер.
Арцыбіскуп Герхард Людвіг Мюлер, 2 ліпеня быў прызначаны прэфектам
Кангрэгацыі Веравучэння, а таксама кіраўніком Камісіі “Ecclesia Dei”, Папскай біблійнай
камісіі і Міжнароднай тэалагічнай камісіі. Ён замяніў на гэтай пасадзе кардынала Уільяма
Леваду, які сышоў у адстаўку з прычыны дасягнення сталага ўзросту.