Papa në festën e shën Pjetrit e Pali: në Kishë forcat e së keqes nuk do të ngadhënjejnë.
Dyert e ferrit nuk do të ngadhnjejnë mbi Kishën, pavarësisht se ajo nuk është e përsosur.
Në festën e Shën Pjetrit e të Shën Palit, Papa Benedikti XVI kremtoi meshën në Bazilikën
e Vatikanit dhe u dha palion 43 kryeipeshkvijve të rinj metropolitë, duke vulosur
me këtë gjest, bashkimin e tyre me Pasardhësin e Shën Pjetrit. Tre prelatëve të tjerë,
palio do t’u dorëzohet në selitë e tyre ipeshkvnore. Kisha, theksoi Ati i Shenjtë,
është bashkësi mëkatarësh, që kanë nevojë për dashurinë e Zotit e kujtoi premtimin
e Jezusit bërë Pjetrit, Apostullit, që e zgjodhi si shkëmb, mbi të cilin do të ndërtonte
Kishën e vet. Pjetri e Pali, vëllezër
në fenë e Krishtit! Gjatë Meshës, Papa nënvizoi se nëse me Kainin, që vret vëllain
e vet, Abelin, tregohen pasojat e mëkatit, me Pjetrin e me Palin, realizohet një mënyrë
e re për të qenë vëllezër, jetuar sipas Ungjillit. Sa të ndryshëm, aq edhe të afërt,
theksoi Benedikti XVI: “Vetëm shkuarja pas Jezusit çon në vëllazërimin e ri:
ja mesazhi i parë themelor, që na jep solemniteti i sotëm secilit prej nesh. Rëndësia
e tij pasqyrohet edhe në kërkimin e bashkimit të plotë, që e dëshirojnë Patriku Ekumenik,
Ipeshkvi i Romës dhe të gjithë të krishterët”. Fjalë, që u drejtoheshin edhe
anëtarëve të delegacionit të Patriarkatit Ekumenik të Kostandinopojës, ardhur si gjithmonë
në Vatikan për festën e dy apostujve shenjtorë. Pikërisht tek misioni i njërit prej
tyre, tek misioni që Zoti ia besoi Shën Pjetrit për të qenë guri i këndit i Kishës,
u përqendrua më pas Papa. Duke pasur parasysh gjendjen aktuale të Kishës Katolike,
me problemet e shkandullet e fundit, Benedikti XVI vuri në dukje se ekzistojnë tensione
ndërmjet dhuratës, që vjen nga Zoti, dhe aftësive e dobësisë njerëzore. Ky tension
pasqyrohet në historinë e papëve: “Nga njëra anë, falë dritës dhe forcës, që
vijnë nga lart, papati përbën themelin e Kishës, shtegtare në kohë; nga ana tjetër,
përgjatë shekujve del në pah edhe dobësia e njerëzve, të cilën mund ta shndërrojë
vetëm gatishmëria për të pranuar veprimin e Hyjit”. Pikërisht në këtë çast
të homelisë, Papa kujtoi premtimin e Jezusit se dyert e ferrit, pra, forcat e së keqes,
nuk do të ngadhnjejnë. Jezusi, shpjegoi Ati i Shenjtë, bën një premtim shumë më të
madh, nga ç’u qe thënë profetëve, të cilët kërcënoheshin nga armiq njerëzorë, ndërsa
shën Pjetri duhej mbrojtur nga fuqia shkatërruese e së keqes: “Pjetri merr siguri
për të ardhmen e Kishës e të bashkësisë së re, themeluar nga Jezu Krishti. (Ky premtim)
shtrihet në të gjitha kohët, përtej ekzistencës personale të vetë shën Pjetrit”. Papa
kujtoi pastaj, simbolin e çelësave të Mbretërisë Qiellore, të cilat Krishti ia besoi
shën Pjetrit, duke i dhënë fuqi për të lidhur e për të zgjidhur. C’do të bësh në tokë,
e siguroi, do të bëhet edhe në qiell: “Paralelizmi “mbi tokë… në qiell” garanton
se vendimet e Shën Pjetrit në ushtrimin e funksionit të tij kishtar, kanë vlerë edhe
para Zotit”. Është e qartë, vazhdoi Benedikti XVI, se pushteti për të lidhur
e për të zgjidhur ka të bëjë me shlyerjen e mëkateve. Është pikërisht ky hir i jashtëzakonshëm
i Hyjit, në zemër të shërbimit të Kishës, që u shterron energjitë forcave të kaosit
e të së keqes: “Ajo (Kisha) nuk është bashkësi të përsosurish, por mëkatarësh,
që duhet ta pranojnë se kanë nevojë për dashurinë e Zotit, kanë nevojë të purifikohen
përmes Kryqit të Jezu Krishtit”. Së fundi, duke iu drejtuar metropolitëve,
që morën palion, Papa theksoi rëndësinë e përmasës themelore të bashkimit në Kishë: “Të
frymëzuar nga kjo siguri, le të ndjehemi të gjithë, bashkëpunëtorë të së vërtetës,
e cila – siç e dimë – është një e vetme, ‘sinfonike’ dhe kërkon nga secili prej nesh
e nga bashkësitë tona, impenjim të vazhdueshëm për kthimin e zemrave kah Hyji i vetëm,
në hirin e të vetmit Shpirt Shenjt”. Pas Meshës, gjatë lutjes së Engjëllit
të Tënzot në Sheshin e Shën Pjetrit, Papa falenderoi besimtarët e sidomos të rinjtë,
të cilët përmes ‘tam-tamit’ në Facebook e në Twitter, u mblodhën sot paradite në shesh
për t’i shprehur Benediktit XVI afërsinë e tyre shpirtërore e mbështetjen morale në
këto çaste të vështira për Kishën: “Të dashur miq, ju falenderoj ngrohtësisht
për këtë gjest dashurie e për nismat në përkrahje të shërbimit tim apostolik, si edhe
për favorizimin e dëshmisë së guximshme dhe aktive të krishterë, në çdo ambient. I
llogaris edhe lutjet tuaja në rrugën për t’i shërbyer Kishës me butësinë e forcën
e Shpirtit Shenjt”. Benedikti XVI nuk mungoi të verë në dukje edhe shenjat
e qarta të jetës e të vdekjes së Shën Pjetrit e të Shën Palit në historinë e Romës.
Martirizimi i tyre, tha Papa, është shenjë e bashkimit të Kishës: “Shenjtorët
Pjetër e Pal shkëlqejnë jo vetëm në qiellin e Romës, por edhe në zemrën e të gjithë
besimtarëve, që, të shndritur nga mësimet e nga shembulli i tyre, ecin në udhën e
fesë, të shpresës e të dashurisë në çdo anë të botës”. Në fund, Benedikti XVI
përshëndeti delegacionin e Patriarkatit Ekumenik të Kostandinopojës, duke iu lutur
Zojës së Bekuar t’i udhëheqë të gjithë besimtarët në Krishtin drejt bashkimit të vërtetë
e të plotë.