Егіпет: новаабраны Прэзідэнт сустрэўся з каталіцкімі біскупамі
Новаабраны прэзідэнт
Егіпта Мухамед Мурсі 27 чэрвеня сустрэўся з каталіцкімі біскупамі краіны. Трэба адзначыць,
што напярэдадні падобная сустрэча прайшла з праваслаўнымі іерархамі. Прэс-сакратар
біскупскай канферэнцыі Егіпта кс. Рафік Грэйхе ў інтэрв’ю агенцтву “AsiaNews” распавёў,
што падчас сустрэчы Прэзідэнт запэўніў іерархаў у садзейнічанні вырашэнню праблем
хрысціян у краіне. “Гэта добры знак для будучыні хрысціян у Егіпеце”, - лічыць кс.
Грэйхе і падкрэслівае, што сустрэча адбылася па ініцыятыве новаабранага Прэзідэнта.
“Ён жадаў асабіста сустрэцца з біскупамі, каб прадэманстраваць гатоўнасць супрацоўнічаць
на карысць вырашэння праблем нашай супольнасці”, - сказаў прадстаўнік каталіцкага
епіскапата.
Паводле кс. Грэйхе, Мурсі пацвердзіў таксама магчымае прызначэнне
на пасады віцэ-прэзідэнтаў жанчыны і хрысціяніна копта. “Гэта б стала зваротным момантам
для краіны, пры умове, што прызначаныя будуць мець рэальную ўладу. У адваротным выпадку,
гэтыя прызначэнні стануць толькі паказухай”, - лічыць прэс-сакратар епіскапату.
Мурсі
падчас выбарчай кампаніі неаднаразова заяўляў, што хоча “стаць прэзідэнтам усіх егіпціян”,
а не толькі мусульман. На думку аналітыкаў – будучыня пакажа, ці не з’яўлялася гэта
выключна тактыкай для забеспячэння сабе падтрымкі хрысціянскай меншасці.