Кс. Фэдэрыко Ламбардзі,
кіраўнік Залы Друку Апостальскай Сталіцы паведаміў, што Бэнэдыкт ХVI 23 чэрвеня правёў
кансультацыі з кіраўнікамі дыкастэрый Рымскай Курыі і некаторымі іншымі кардыналамі,
адносна прыняцця адпаведных рашэнняў пасля крадзяжу дакументаў Святога Айца і Апостальскай
Сталіцы. “У сувязі з сітуацыяй, якая склалася пасля распаўсюджання гэтых канфідэнцыйных
дакументаў, Святы Айцец хоча паглыбіць сваё бачанне па гэтым пытанні праз пастаянны
дыялог з асобамі, якія разам з ім адказваюць за кіраванне Касцёлам”, - сказаў кс.
Ламбардзі. Прадстаўнік Святога Пасаду адзначыў таксама, што ў мінулую суботу, 16 чэрвеня,
Пантыфік сустрэўся са спецыяльнай Камісіяй кардыналаў, якая займаецца пытаннем уцечак
інфармацыі з Ватыкану.Кс. Ламбардзі паінфармаваў, што 23 чэрвеня, у другой палове
дня, “Пантыфік вырашыў сусрэцца з некаторымі членамі Калегіі кардыналаў, якія дзякуючы
свайму вялікаму вопыту ў служэнні Касцёлу, не толькі ў Рыме але і за мяжой, могуць
абмяняцца з Папам сваімі заўвагамі і прапановамі, і, такім чынам, унесці свой ўклад
у аднаўленне жаданага клімату спакою і даверу ў служэнні Рымскай курыі”.
Кіраўнік
Залы Друку падкрэсліў, што ў наступныя дні Святы Айцец будзе працягваць свае размовы
па гэтым пытанні са шматлікімі іерархамі, якія прыбудуць у Рым з нагоды ўрачыстасці
Святых апосталаў Пятра і Паўла. “Гэта надзвычайная нагода для супольнасці Паўсюднага
Касцёла, адчуць сябе аб’яднанай Пантыфікам у малітве, служэнні і сведчанні веры для
чалавецтва нашых часоў”, - сказаў кс. Ламбардзі.