Бэнэдыкт XVI сустрэўся з членамі Сходу па справах дапамогі Усходнім Касцёлам
21 чэрвеня Бэнэдыкт
XVI прыняў на аўдыенцыі ўдзельнікаў cесіі Сходу па справах дапамогі Усходнім Касцёлам
(ROACO). Форум арганізацыі праходзіў ў Рыме 18-20 чэрвеня. Звяртаючыся да прысутных,
Папа адзначыў, што актуальная сацыяльна-эканамічная сітуацыя мае наступствы для касцёльнага
жыцця у тым ліку і на Усходзе – “радзіме старажытных хрысціянскіх традыцый”. Святы
Айцец сказаў, што існуючыя нестабільнасць і небяспека ўскладняюць дыялог, перашкаджаюць
спакойнаму і мірнаму суіснаванню паміж народамі, павазе да правоў чалавека, асабліва
да свабоды веравызнання. Паводле Святога Айца гэта права павінна гарантавацца не толькі
адносна публічнага вызнавання веры, але таксама пастырскай, адукацыйнай і сацыяльнай
дзейнасці. Бэнэдыкт XVI звярнуў увагу на праблемы ў Сірыі і выразіў сваю блізкасць
да нявінных ахвяр канфлікта ў гэтай краіне. Ён выказваў спадзяванне, што малітва і
дзейнасць Касцёла, “стане алеем суцяшэння” і дапаможа падтрымліваць святло надзеі
ў гэтыя моманты цемры. Папа заклікаў міжнародную супольнасць дапамагчы Сірыі выйсці
з крызісу і гарантаваць насельніцтву неабходную гуманітарную дапамогу.
“Будзьце
заўсёды знакам любові, якая паходзіць з сэрца Хрыста і прадстаўляе Касцёл свету ў
яго самай сапраўднай сутнасці і місіі, ставячы яго на служэнне Богу, які ёсць Любоўю”,
- заахвоціў членаў Сходу па справах дапамогі Усходнім Касцёлам Бэнэдыкт XVI.