Thirrje e Papës për Sirinë në fjalimin drejtuar Roako-s
Benedikti XVI kërkon të mos kursehet asnjë përpjekje, edhe nga ana e bashkësisë ndërkombëtare,
për të krijuar kushtet që Siria të dalë nga situata e sotme e dhunës. Kërkon edhe
garancitë e nevojshme për ndihmën humanitare. Ati i Shenjtë e bëri këtë thirrje,
në fjalimin shumëgjuhësh, drejtuar rreth 80 pjesëmarrësve në Asamblenë e 85-të të
Bashkimit të Veprave të Ndihmës për Kishat Lindore (Roako), të cilët i priti sot paradite
në audiencë, në Sallën e Klementine, në Vatikan. Asambleja e Roako-s, e kujtojmë,
u mblodh në Romë që të hënën, deri dje, kur përfunduan punimet. Ndërsa sot, pjesëmarrësit
u takuan me Papën. E, duke i pritur, Benedikti XVI e drejtoi menjëherë vështrimin
nga Siria, duke kujtuar plagët e thella, që vijojnë t’i hapen vendit. Në fjalimin
drejtuar Roako-s, kryesuar nga kryetari i saj, kardinali Leonardo Sandri, edhe prefekt
i Kongregatës për Kishat Lindore, Papa kërkoi ndihmë për këtë vend të martirizuar: Të
mos kursehet asnjë përpjekje, edhe nga ana e bashkësisë ndërkombëtare,
për ta nxjerrë Sirinë nga gjendja e dhunës dhe e krizës, që vijon prej shumë kohe
dhe krijon rrezikun e shpërthimit të një konflikti të përgjithshëm, me pasoja shumë
negative për vendin e për mbarë zonën. Bëj thirrje të fuqishme për t’i dhënë
sa më shpejt ndihmë popullsisë,që jeton në kushte tepër të vështira
e për t’u siguruar ndihmën e nevojshme humanitare edhe njerëzve, që u detyruan ta
largohen nga shtëpitë e tyre, duke u strehuar në vendet fqinje. Vlera e jetës njerëzore
është tepër e çmuar e duhet mbrojtur në e me çdo kusht, kujtoi Benedikti XVI, e, në
vijim, u shprehu afërsinë e tij vëllezërve e motrave të Sirisë, posaçërisht të vegjëlve
të pafajshëm e njerëzve më të pambrojtur, që po vuajnë kaq shumë: Lutja jonë,
impenjimi ynë e vëllazëria jonë konkrete në Krishtin, si vaj ngushëllimi,
i ndihmoftë të mos mbeten pa dritën e shpresës në këto çaste kaq të errëta e të nxjerrin
nga Zoti hirin e urtisë së zemrës për shkaktarët e kësaj situate, që të pushojnë më
në fund, gjakderdhja e dhuna, të cilat sjellin vetëm dhimbje e vdekje, e t’i hapet
rruga ripajtimit, harmonisë e paqes.
Në asamblenë e Roako-s sivjet, përveç
përfaqësuesve të Tokës së Shenjtë, duke nisur nga delegati apostolik, imzot Antonio
Franko, ishin të pranishën edhe kryeipeshkvijtë e mëdhenj të Kishës Siro-malabareze
të Indisë, Fortlumturia e Tij, Kardinali Xhorxh Alençerri dhe Kishës greko–katolike
të Ukrainës, Fortlumturia e Tij, Sviatoslav Shevçuk, nunci apostolik i Sirisë, imzot
Mario Zenari dhe ipeshkvi që drejton Karitasin sirian. Kjo prani, vërejti Papa, e
mundëson Kishën e Romës ta zgjerojë edhe më shumë vështrimin, duke rrokur këtë përmasë
universale, që përbën një nga tiparet themelore të misterit ë Kishës. Benedikti
XVI e nxiti me forcë Kongregatën të vijojë veprimtarinë bamirëse, në mënyrë që Tokës
së Shenjtë dhe trojeve të tjera lindore, të mos u mungojë ndihma shpirtërore e materiale.
E kjo bëhet edhe më urgjente, duke pasur parasysh se kriza e sotme godet më shumë
zonat më pak të zhvilluara të botës, përfshirë edhe Lindjen, mëmëdhe i traditave më
të lashta të krishtera, duke shkaktuar pasiguri e paqëndrueshmëri edhe në nivelin
kishtar si dhe në fushën ekumenike e ndërfetare. Bëhet fjalë për faktorë, nënvizoi
Benedikti XVI, që i ushqejnë plagët e historisë dhe e bëjnë më të brishtë dialogun,
paqen, bashkëjetesën ndërmjet popujve, respektimin e të drejtave të njeriut e, posaçërisht,
të drejtën për liri fetare personale e komunitare. Kjo e drejtë duhet garantuar,
theksoi me forcë Papa, që çdo njeri të mund ta praktikojë publikisht fenë e vet, jo
vetëm në terma kultuale, por edhe baritore, edukative, ndihme shoqërore e në të gjitha
aspektet e nevojshme për ushtrimin e lirshëm të fesë. Ati i Shenjtë u kërkoi pjesëmarrëve
të jenë shenja të dukshme të dashurisë së krishterë, e cila gurron nga vetë Zemra
e Krishtit e ia paraqet botës Kishën në identitetin e në misionin e saj më të vërtetë,
në shërbimin ndaj Zotit, që është Dashuri. Benedikti XVI kujtoi, në përfundim,
Vitin e Fesë, që do t’i hapë horizonte të reja Veprave të Ndihmës për Kishat Lindore
dhe kërkoi ndërmjetësimin e Zojës së Bekuar për Kishat Lindore në vendet amtare e
në diasporë. Duke kujtuar vizitën e tij në Liban, Papa iu lut Nënës së Krishtit: “Më
ndihmoftë Ajo në shtegtimin tim që, në dashtë Zoti, do ta bëj në Liban, për të vënë
vulën mbi Asamblenë e Posaçme të Sinodit të Ipeshkvijve për Lindjen e Mesme”.