У самай вялікай дыяцэзіі
ў свеце быў кансэкраваны ўсяго толькі трынаццаты касцёл. 17 чэрвеня ў Краснаярску,
ардынарый дыяцэзіі св. Юзафа ў Іркуцку біскуп Кірыл Клімовіч ўрачыста кансэкраваў
новы храм пад тытулам Святой Сям’і. Гэта святыня стала другім каталіцкі касцёлам у
Краснаярску. Першы, які носіць тытул Перамянення Пана быў пабудаваны яшчэ ў 1911 г.
У сваёй гаміліі біскуп Клімовіч нагадаў, што дыяцэзія св. Юзафа тэрытарыяльна з’яўляецца
самай вялікай ў свеце і займае плошчу амаль у 10 млн. км. кв. Аднак, паводле іерарха,
колькасць святынь на такой вялікай тэрыторыі з’яўляецца вельмі малой. Таму з’яўленне
кожнага новага храма вельмі важна. Іерарх з радасцю падкрэсліў, што працаваць у касцёле
будзе першы святар з Краснаярска.
Падчас кансэкрацыі новага касцёла прысутнічалі,
акрамя вернікаў, святароў і законнікаў, таксама прадстаўнікі мясцовых уладаў на чале
з мэрам Краснаярска, Эдхамам Акбулатам, які падкрэсліў, што гэты горад мае багатыя
рэлігійныя традыцыі. “Святыня кожнай рэлігіі пашырае духоўны памер горада і спрыяе
паляпшэнню маральнага аблічча яго жыхароў”, - сказаў чыноўнік.