Ватыканская статыстыка: колькасць пакліканняў у свеце расце

Галоўны рэдактар афіцыйнага Папскага статыстычнага штогодніка і дырэктар аддзела статыстыкі Касцёла пры Дзяржсакратарыяце кс. прэлат Вітторыё Формэнці адзначыў, што апошняе дзесяцігоддзе адзначаецца ростам святарскіх пакліканняў – як законных, так і дыяцэзіяльных. Кіраўнік аддзела статыстыкі падкрэсліў, што сучасныя СМІ звяртаюць вялікую ўвагу на крызіс пакліканняў, што насамрэч не адлюстроўвае рэальнай сітуацыі. Напрыклад, у перыяд з 2000 па 2010 г. колькасць святароў узрасла з 405 тыс. да 413 тыс. Таксама іерарх адзначыў, што павялічылася колькасць просьбаў аб вяртанні да святарскага стану. Ватыканскі іерарх назваў гэту з’яву своеасаблівым падарункам для Бэнэдыкта XVI з нагоды Года святарства, бо толькі ў гэты год было пададзена аж 460 запытаў, у параўнанні з некалькімі дзесяткамі такіх лістоў у мінулыя гады.