Kongresi Eukaristik i Dublinit. Papa: shpërdorimet, plagë e tmerrshme në historinë
e Kishës irlandeze.
“Liturgjia paskonciliare i afroi më shumë besimtarët pranë shpirtit të Meshës, por
pa harruar se nuk mungojnë as keqkuptimet e parregullsitë”. Është kjo një nga vërejtjet
kryesore të Benediktit XVI në videomesazhin, ndjekur nga mijëra njerëz, që morën
pjesë të dielën pasdite në Meshën e madhe, me të cilën u mbyllën punimet e Kongresit
të 50-të Eukaristik Ndërkombëtar të Dublinit. Të forta, fjalët e Papës, për klerin
e ngarkuar me përgjegjësinë e tmerrshme të dhunës mbi të miturit: “veprime të frikshme,
tha Benedikti XVI, që minuan besimin e njerëzve në mesazhin e Kishës”. Ati i Shenjtë
dha edhe njoftimin për selinë e ardhshme të Kongresit: do të jetë qyteti i Çebu-së,
në Filipine.
“Një mister”.
Gati i çarmatosur, Benedikti XVI, përballë tmerrit. Papa iu drejtua nga Roma atyre,
që prej një jave, depërtuan në thellësi të Sakramentit të Eukaristisë e që kërkojnë
forcë e dritë në Bukën e jetës, për ta ndjerë me zemër e për ta prekur me dorë se
Kisha irlandeze është vërtet në udhën e përtëritjes. Por Papa nuk mund të heshtë:
“Jeni trashëgimtarë të një Kishe, që ka qenë forcë e pushtetshme në botë, nënvizoi,
duke kujtuar breznitë e murgjërve, martirëve e misionarëve të këtyre trojeve që e
kumtuan me heroizëm të rrallë Ungjillin e Krishtit”. E megjithatë, ndokush, pohoi
me dhimbje të thellë Ati i Shenjtë, e njollosi në mënyrë të llahtarshme këtë histori
të madhe feje. E njollosën disa priftërinj e rregulltarë, të cilët i shpërdoruan pikërisht
ata, që duhet t’i mbronin: “Si mund ta shpjegojmë faktin që njerëz, të cilët
e kanë marrë rregullisht Korpin e Krishtit e i kanë rrëfyer mëkatet e veta në Sakramentin
e Rrëfimit, arritën deri në këtë fyerje kaq të rëndë? Mbetet mister! Por sigurisht
krishterimi i tyre nuk ushqehej më nga takimi gazmor me Jezu Krishtin: ishte bërë
thjesht një zakon”. Feja e zakoni janë rrugë që nuk kryqëzohen. Papa përdori
fjalë, të cilat dukej se nuk e përshkruanin, por i këndonin dhuratës së pashembullt,
që Zoti i bëri Kishës dhe njerëzimit, duke i dëftuar Krishtin: “Feja
jonë katolike, e mbushur plot me ndjesinë e thellë të pranisë së Zotit, e rrëmbyer
nga bukuria e krijimit, që e rrethon, e pastruar përmes pendesës personale e vetëdijes
të faljes së Zotit, është trashëgimi që sigurisht përsoset e shujtohet, kur vendoset
rregullisht mbi elterin e Zotit në Flijimin e Meshës”. E këtu Benedikti
XVI bëri një vërejtje tjetër të rëndësishme. Feja, që përsoset mbi elterin e Meshës,
ka nevojë për kremtime të mbushura me gëzim, të thjeshta, por të përgatitura në mënyrën
më të denjë e më të nderueshme, që është e mundur. Është e qartë që Koncili II i Vatikanit,
vërejti Papa, duke risuar liturgjinë, arriti një rezultat shumë të madh... “...
por është po aq e qartë edhe se ka pasur shumë keqkuptime e parregullsi. Rismi i formave
të jashtme, i dëshiruar nga Etërit Konciliarë, synonte ta bënte më të lehtë hyrjen
në thellësitë e mëdha të misterit”. Por kjo dëshirë mbeti e parealizuar
plotësisht sepse, shpesh herë, vërejti Benedikti XVI, rishikimi i formave liturgjike
mbeti i sipërfaqshëm, ndërsa ‘pjesëmarrja aktive’ u ngatërrua me veprimtarinë e jashtme: “Prandaj
mbetet shumë për të bërë në rrugën e risimit të vërtetë liturgjik. Në një botë të
ndryshuar, me sytë gjithnjë të ngulur mbi vlerat materiale, duhet të mësohemi ta njohim
përsëri praninë misterioze të Zotit të ngjallur, i vetmi që mund t’i japë frymë e
thellësi jetës sonë”. Më pas Papa i foli Kishës për veprimtaritë e tij
të ardhshme, ndërmjet dy ngjarjeve të mëdha: Vitit të Fesë dhe 50-vjetorit të Koncilit
II të Vatikanit, duke e mbyllur Kongesin e Dublinit, me sytë ngulur mbi Kongresin
e ardhshëm, mbi kontinentin, që për Kishën është tokë e pranisë së lashtë e të re
të martirëve, mbi Azinë: “Njëkohësisht dëshiroj t’ju ftoj të bashkoheni me
mua për t’i kërkuar Zotit bekimin mbi Kongresin e ardhshëm Eukaristik Ndërkombëtar,
që do të mbahet më 2016, në qytetin e Cebu-së”. Popullit të Filipineve,
përfundoi Ati i Shenjtë, i drejtoj përshëndetjen më të ngrohtë, duke e siguruar për
afërsinë time në lutje gjatë gjithë periudhës të përgatitjes së këtij takimi të madh
kishtar. Videomesazhi i Papës u transmetua gjatë kremtimit përfundimtar të Kongresit
të 50-të Eukaristik Ndërkombëtar të Dublinit.