Кардынал Бэртонэ: св. айцец Піо паказаў сучаснаму свету годнасць крыжа
“Жыццё і місія св.
айца Піо сведчаць, што цяжкасці і боль, калі прымаюцца дзеля любові, перамяняюцца
ў прывілеяваны шлях да святасці”, - гэтыя словы бл. Яна Паўла ІІ нагадаў 16 чэрвеня
кардынал Дзяржсакратар Тарчызіо Бэртонэ. Іерарх узначаліў св. Імшу з нагоды 10-й гадавіны
кананізацыі св. айца Піо з П’етрэльчыны. Яна прайшла ў гарадку Сан Джаванні Ратонда
– месцы дзе доўгія гады жыў святы, а зараз захоўваюцца яго рэліківіі. Кардынал Бэртонэ
адзначыў, што св. айцец Піо паказаў чалавецтву нашага часу годнасць крыжа, які можа
стаць таксама знакам надзеі. “Так, дарагія браты і сёстры, бо крыж неабходны для пераходу
да новага жыцця ў Хрысце”, - сказаў кардынал.
Іерарх звярнуў увагу на тое,
што ў Евангеллі, якое чыталася падчас літургіі, прагучала праслаўленне Езусам Айца,
за тое, што Ён адкрыў таямніцы Божага Валадарства малым і схаваў іх ад вялікіх і магутных.
“Малыя – гэты тыя, якія прымаюць Хрыста, прызнаючы ўласныя слабасці і не баючыся свайго
крыжа. Яны не прамаўляюць паводле чалавечай мудрасці, але ў іх прамаўляе знаёмства
з Богам і яго любоўю”, - сказаў кардынал Бэртонэ. Ён дадаў, што “веданне любові Айца
з’яўляецца праўдай, што ўцякае ад многіх, але яе разумеюць малыя, якія не здольныя
трымаць толькі для сябе гэты скарб, а адчуваюць заклік дзяліцца ім з іншымі”. Менавіта
гэтыя рысы, паводле кардынала Бэртонэ характарызавалі святарскае служэнне св. айца
Піо, які вёў да Хрыста тых, чые целы і душы былі абцяжараны і прыгнечаны.
Іерарх
адзначыў, што асоба святога збірала вакол сябе шматлікіх свецкіх. “Айцец Піо пачаў
жыць як Хрыстус, таму здолеў увайсці ў блізкі і моцны дыялог з Ім у малітве. Так,
знаходзячыся ў школе Хрыста, схіляючы сваю галаву на Яго сэрца і становячыся экспертам
у распазнанні Яго ўнутраных памкненняў, ён таксама стаў настаўнікам для тых, хто шукаў
айцоўскага духоўнага кіраўніцтва, спрыяючы з’яўленню ў іх плёнаў добрага жыцця”, -
сказаў кардынал Бэртонэ.