Kongresi Eukaristik i Dublinit. Intervistë me imzot Uiljam Shomalin, ipeshkëv në Tokën
Shenjte.
“Meshtarë e laikë: t’i vënë të gjitha dhantitë në shërbim të Eukaistisë”, është
një nga temat me rëndësi, mbi të cilën po reflektohet në Kongresin Eukaristik Ndërkombëtar
të Dublinit. Në ngjarjen e madhe eukaristike marrin pjesë 20 mijë vetë, ardhur nga
mbarë bota. Ndërmjet tyre, edhe një përfaqësi e të krishterëve të Lindjes së Mesme,
posaçërisht nga Jordania, Palestina e Izraeli. Intervistuam, me telefon, nga Irlanda,
imzot Uiljam Shomalin, ipeshkëv ndihmës i Patriarkanës të Latinëve në Jeruzalem:
Përgjigje:
- Jemi të vetëdijshëm për rëndësinë e pranisë sonë, si Tokë Shenjte, në
Irlandë. Posaçërisht në këtë çast. Po ju rrëfej se nuk ishte aspak e lehtë të organizohej
një shtegtim, për të ardhur deri këtu. Vetëm për të marrë vizën për të krishterët
palestinezë e jordanezë, na u desh të jetonim një dramë të vërtetë, tejet të vështirë.
Shumë kërkesa, e edhe më shumë kohë për të siguruar vizat. Por ne, prapëseprapë nuk
hoqëm dorë e ja, jemi këtu. Në se miliona shtegtarë vijnë në Tokën Shenjte, e ne jemi
të kënaqur për këtë, mendoj se edhe irlandezët janë po aq të kënaqur për gjithë këtë
afërsi nga mbarë bota, në kohë të vështira e në një rast të pashoq: në një Kongres
Eukaristik, që mbahet çdo katër vjet. Irlanda ka nevojë për solidaritetin tonë. E
ne e ndjemë këtë e vendosëm të vinim. Jemi 33 përfaqësues, një ipeshkëv e katër meshtarë,
të të gjitha riteve, ndërsa të tjerët janë laikë nga Jordania, Palestina, Izraeli,
por edhe arabo-amerikanë të diasporës, që deshën të bashkohen me ne. E kështu u bëmë
grup ndërkombëtar, edhe pse vijmë nga Toka Shenjte.
Pyetje: - Prania
juaj këtu, në Irlandë, tregon me forcë të veçantë ç’do të thotë ta jetosh Eukaristinë,
ta jetosh bashkimin. Ç’mund t’u themi besimtarëve të mbarë botës për këtë dhuratë?
Përgjigje:
- Eukaristia është dhurata më e madhe, që na bën Zoti, sepse Ai na jep
vetveten, përtërin kushtimin ndaj Atit, për ne, është shëlbimi në veprim, që vijon.
Këtu vijmë dhe për shpirtin tonë, për të thelluar kuptimin e Eukaristisë, si prani
e dhuratë, të cilën Jezusi ia kushton Atit, por edhe si kushtim të vetvetes, bashkuar
me atë të Krishtit, që merr vlerë prej Tij: Eukaristia ka shumë kuptime të thella
e njëri nga qëllimet e Kongresit Eukaristik është pikërisht matja e këtyre thellësive.