Benedikti XVI vlerëson lart dëshminë e Nënë Terezës
Benedikti XVI kujtoi sot, gjatë audiencës së përgjithshme, të Lumen Nënë Terezë dhe
gjermanin alsacian, Albert Shvaicer, misionar në Afrikë, mjek e muzikant, që të dy
“Çmim Nobel për Paqen” dhe frymëzues të mëdhenj të solidaritetit. Sa më shumë
lutemi, tha Papa duke e kujtuar të Lumen shqiptare, aq më shumë shikojmë se jeta jonë
shndërrohet e gjallërohet nga forca konkrete e Zotit. Kështu i ndodhi, për shembull,
së Lumes Terezë të Kalkutës. Pikërisht në kohët e shkretëtirës shpirtërore, nëpër
të cilën iu desh të përshkohej, kujtoi Ati i Shenjtë, ajo vijoi të kundrojë me ngulm
Jezu Krishtin. Në këtë kundrim gjeti forcën e guximin e pabesueshëm për ta parë Zotin
në fytyrën e njerëzve të varfër e të braktisur, ashtu e brishtë, siç ishte. Kundrimi
i Krishtit në jetën tonë, nuk na largon nga realiteti, përkundrazi, na nxit të marrim
pjesë edhe më shumë në fatet e njerëzve, sepse Zoti, duke na bërë për vete në lutje,
na mundëson të jemi të pranishëm e të afërt për çdo vëlla, në dashurinë e tij.