Папа да будучых дыпламатаў Святога Пасаду: сябруйце з Касцёламі і супольнасцямі, куды
вас накіруюць
11 чэрвеня Бэнэдыкт
XVI сустрэўся з выкладчыкамі і студэнтамі Папскай Касцёльнай Акадэміі – установы,
якая рыхтуе дыпламатычных прадстаўнікоў Апостальскай Сталіцы. Сустрэча прайшла з нагоды
заканчэння навучальнага года і падрыхтоўкі выпускнікоў акадэміі да пачатку выканання
дыпламатычнай місіі. У сваёй прамове Пантыфік звярнуў увагу на цноту вернасці. Святы
Айцец нагадаў, што ў біблійным кантэксце вернасць, гэта перш за ўсё Боская характарыстыка,
якую Стварыцель перадаў чалавеку. Ён заклікаў будучых дыпламатаў “захоўваць сувязь
з Вікарыем Хрыста, як частку сваёй духоўнасці”. “Канешне, гэта тычыцца кожнага католіка,
і яшчэ больш кожнага святара”, - сказаў Папа і дадаў, што для тых хто дзейнічае ад
імя Апостальскай Сталіцы, гэта вымярэнне набывае асаблівы характар. “Гаворка ідзе
аб вялікай адказнасці, а таксама аб асаблівым дары”, - адзначыў Бэнэдыкт XVI.
Папа
падкрэсліў, што дыпламатычныя прадстаўнікі Святога Пасаду пакліканы да “сапраўднага
сяброўства” з тымі мясцовымі Касцёламі і супольнасцямі ў якія яны будуць накіраваны.
Святы Айцец патлумачыў, што гэта “сяброўства” “канкрэтызуецца праз руплівую штодзённую
працу, прысутнасць паміж імі ў сумныя, шчаслівыя ці нават драматычныя моманты гісторыі,
набыццё глыбокіх ведаў аб іх культуры, касцёльным жыцці, каб быць здольнымі ацэніць
наколькі Божая ласка дзейнічала ў кожным народзе і нацыі”.
Бэнэдыкт XVI адзначыў,
што такім чынам нунцыі змогуць спрыяць умацаванню вернасці Рымскаму Пантыфіку з боку
мясцовых Касцёлаў і дапамагчы самаму Наступніку св. Пятра быць верным місіі атрыманай
ад Хрыста, даючы яму магчымасць лепш ведаць стататак яму давераны і больш эфектыўна
дасягаць яго сваім словам, блізасцю і любоўю”.