Indi; në Mumbai adhurimi eukaristik për Korpin e Krishtit iu besua Motrave të të Nënë
Terezës.
Edhe Kisha katolike e Indisë e kremtoi dje, e dielë, 10 qershor, Korpin e Krishtit.
Për këtë solemnitet, kryedioqezi i Mumbait vendosi t’ia besojë adhurimin eukaristik
motrave të Nënë Terezës, që drejtojnë Asha Dan (Dhuratë e shpresës), strehë për njerëz
me kufizime mendore, të varfër e të sëmurë. Rregulltaret, shpjegon për agjencinë
AziaNjuz, atë Antoni Karangat, drejtor i së përjavshmes dioqezane “The Examiner”(Thi
ig’zæmine) e shikojnë lutjen si burim force. Pa të, motrat e Nënë Terezës do ta kishin
tepër vështirë ta kryenin misionin e tyre të përditshëm, ndërmjet njerëzve, që shoqëria
i flak pa pikën e kujdesit në rrugë të madhe. Zgjedhja e motrave të bamirësisë për
organizimin e çastit të adhurimit të të Shenjtnueshmit Sakrament, ishte përgjigje,
që i jepej prirjes së sotme për të vënë theksin vetëm mbi përmasën shoqërore të Eukaristisë. Kryedioqezi
i Mumbait nënvizoi, kështu, praktikisht, fjalët e Benediktit XVI, shqiptuar të enjten
e kaluar, në Bazilikën e Shën Gjonit në Lateran: “Është gabim t’i kundërvësh kremtimin
e adhurimin, sepse janë dy aspekte kryesore të Misterit Eukaristik, me lidhje të ngushtë
ndërmjet tyre”. “Asha Dan” ndodhet në Bicila, në rrethinat e Mumbait. Drejtohet
nga 12 motra të Nënë Terezës. Streha ka kapanone të mëdha, ku jetojnë më se 400 vetë,
duke përfshirë edhe fëmijë të moshës 2 deri në 8 vjeç, të gjithë të sëmurë, me kufizime
të rënda fizike e mendore. Fëmijëve u shtohen gratë e sëmura nga Sida, që i sjell
këtu çdo ditë policia, së bashku me fëmijët e tyre, për t’i hequr, kështu, nga rrugët
e qytetit, ku janë të rrezikuara, e njëkohësisht, tejet të rrezikshme për popullsinë.
Por jo për motrat e Nënë Terezës. Motra Gjoial, një nga misionaret e strehës, shpjegon
për agjencinë AziaNjuz: “I ushqejmë, i lajmë, u ndërrojmë çarçafët e veshjet, u japim
ilaçet: për ne janë vetë Krishti! Prej këndej, u shërbejmë me të njëjtin respekt trupave
të tyre, kthyer në gërmadhë nga jeta, si të kishim në duar vetë Korpin e Krishtit!
Vdesin të gjithë në duart tona, por kur arrin çasti i mbramë, vënë buzën në gaz, nga
që e dinë se Zoti i do, i pret”. “Krishti, nënvizon motra Magdelita, eprore e
“Asha Dan”, vdiq për të varfërit, për të shtypurit, për të padashurit, për nevojtarët.
Në emër të tij, u shërbejmë me gjithë zemër. Nuk është punë e lehtë. Do forcë. Përkushtim.
Po ne forcën e përkushtimin i gjejmë gjithnjë në lutjen e përditshme e në fytyrat
e tyre. Në ta, shikojmë vetë Krishtin. E përmes shërbimit tonë, u krijojmë mundësinë
të bëhen dëshmitarë të dashurisë së Zotit”.