Недавер да былога кіраўніка Ватыканскага банка грунтуецца на аб’ектыўных фактарах
“Апостальская Сталіца
са здзіўленнем і занепакоенасцю даведалася аб нядаўніх падзеях, у якіх прымаў удзел
прафесар Гоццы Тэдэскі”, - гаворыцца ў спецыяльным паведамленні Залы Друку, апублікаваным
у сувязі з адстаўкай былога кіраўніка Інстытута рэлігійных спраў, больш вядомага як
Ватыканскі банк. Адзначаецца, што Апостальская Сталіца цалкам давярае італьянскім
судовым уладам і выказвае надзею, што ўсе суверэнныя прэрагатывы Святога Пасаду, прызнаныя
на міжнародным узроўні, будуць адпаведна выконвацца і паважацца. Апостальская Сталіца
пацвярджае таксама свой давер да асобаў, якія з адданасцю і прафесіяналізмам прысвяцілі
сябе служэнню фінансавай установе Святога Пасаду. Акрамя таго, у паведамленні Залы
Друку адзначаецца, што недавер, які быў выказаны былому кіраўніку Інстытута рэлігійных
спраў грунтаваўся на аб’ектыўных фактарах, звязаных з кіраваннем установай, а не з
“апазіцыяй да лініі празрыстасці”, вельмі важнай для кіраўніцтва Апостальскай Сталіцы
і самаго Інстытута.