Бэнэдыкт XVI падчас агульнай аўдыенцыі: баронячы нядзелю, мы баронім свабоду чалавека!
6 чэрвеня Бэнэдыкт
XVI падзяліўся з вернікамі сваімі ўспамінамі і ўражаннямі ад удзелу ў Сусветнай сустрэчы
сем’яў, якая праходзіла ў Мілане 30 мая - 3 чэрвеня. Падчас сённяшняй агульнай аўдыенцыі
Пантыфік адзначыў, што “без сям’і чалавецтва не мае будучыні”. Святы Айцец расказаў,
што падарожжа ў Мілан, стала для яго першым з таго часу як ён быў абраны на пасад
св. Пятра. Папа быў вельмі ўражаны цёплым прыёмам, які яму аказалі мясцовыя жыхары,
прадстаўнікі касцёльных і свецкіх уладаў. Бэнэдыкт XVI адзначыў, што першым пунктам
праграмы яго візіту была сустрэча з вернікамі на катэдральнай плошчы горада, падчас
якой ён заклікаў мясцовых вернікаў жыць верай у асабістай і грамадскай сферах і нагадаў,
што сям’ю неабходна нанава адкрыць, як “галоўную спадчыну чалавецтва”. Папа падзяліўся
сваімі ўражаннямі ад канцэрту ў міланскім тэатры “Ла Скала” і Дзевятай сімфоніі Бетховена,
якая гучала на ім. “На заканчэнне гэтай моцнай мастацкай і духоўнай падзеі, я хацеў
звярнуць увагу на месца сям’і ў трэцім тысячагоддзі, нагадваючы, што менавіта ў ёй
чалавек упершыню адчувае, што створаны не для жыцця закрытым у самім сабе, але ў адносінах
з іншымі; менавіта ў сям’і пачынае запальвацца ў сэрцы чалавека святло спакою, каб
затым асвяціць наш свет”, - сказаў Папа.
Святы Айцец распавёў аб сваёй сустрэчы
са святарамі і кансэкраванымі асобамі, падчас якой нагадаў аб каштоўнасці цэлібата
і чысціні, і падзяліўся ўспамінамі ад сустрэчы з моладзю, якую заклікаў казаць свабоднае
і свядомае “так” Евангеллю Езуса Хрыста, клапаціцца аб уласнай адукацыі і шчодра служыць
бліжнім.
Пантыфік звярнуў увагу, што падчас сустрэчы з прадстаўнікамі мясцовых
уладаў, прадпрымальнікамі, рабочымі, дзеячамі культуры і сферы адукацыі, ён заклікаў
спрыяць таму, “каб дзяржаўныя ўстановы служылі клопату аб чалавеку ў розных яго аспектах,
пачынаючы ад права на жыццё” і “празнавалі ўласную ідэнтычнасць сям’і, заснаваную
на сужэнскім саюзе мужчыны і жанчыны”.
Папа нагадаў, што ён разам з тысячамі
вернікаў прыняў удзел у “Свяце сведчанняў”, якое прайшло ў міланскім парку “Брэсса”.
Пантыфік прызнаўся, што яго ўразілі сведчанні сем’яў з розных кантынентаў, якія распавялі
аб актуальных тэмах нашых часоў: эканамічным крызісе, цяжкасцях, звязаных з пошукам
раўнавагі ў прысвячэнні часу для працы і сям’і, павелічэннем колькасці разводаў, а
таксама іншых пытаннях, якія турбуюць дарослых, маладых і дзяцей.
“Тут я хачу
нагадаць, што заклікаў да абароны часу, празначанага для сям’і, якому пагражае, свайго
роду, “звышсіла” працоўных абавязкаў: нядзеля – гэта дзень Пана і чалавека, дзень,
калі ўсе павінны мець магчымасць быць свабоднымі – свабоднымі для сям’і і Бога. Баронячы
нядзелю, мы баронім свабоду чалавека!”, - сказаў Святы Айцец.
Бэнэдыкт XVI
адзначыў, што падчас заключнай св. Імшы, якая адбылася 3 чэрвеня, ён заклікаў вернікаў
спрыяць таму, каб касцёльныя супольнасці станавіліся больш падобнымі на сем’і і былі
здольнымі евангелізаваць не толькі словамі, але “сілай любові, якой жывуць”, бо “любоў
– гэта адзіная сіла, здольная перамяніць свет”. Папа падкрэсліў, што Сусветная сустрэча
сем’яў ў Мілане пакінула свету пасланне надзеі, абгрунтаванае жыццёвым вопытам. “Гэта
магчыма і радасна – “назаўсёды” быць адкрытымі на жыццё, нават калі часам і складана
жыць вернай любоўю; гэта магчыма – удзельнічаць як сям’я ў місіі Касцёла і будаванні
грамадства”, - сказаў Святы Айцец.